پین کیک ہو، چاکلیٹ کیک یا پھر کسی اور فلیور میں تیار شدہ کیک، یہ بچوں اور عمر رسیدہ افراد کا پسندیدہ ہوتا ہے۔

مشرق وسطیٰ کے میٹھے کھانوں کی طرح یورپی ملک ترکی کے کھانے بھی لذیذ ہوتے ہیں، ان ہی ذائقہ دار کھانوں میں ترکی کا سوجی سے تیار ہونے والا کیک بھی شامل ہے، جسے مقامی زبان میں (REVANI) کہا جاتا ہے۔

خیال رہے کہ یہی کیک یونان سمیت دیگر ممالک جب کہ مشرق وسطیٰ کے ممالک لبنان اور مصر میں بھی تیار ہوتا ہے۔

اس مزیدار کیک کی ترکیب یہاں دی جارہی ہے۔

اجزاء

سیرپ بنانے کے لیے

چینی 3 کپ

پانی 4 کپ

لیموں کا رس 2 کھانے کے چمچ

کیک تیار کرنے کے لیے

انڈے 9 عدد

چینی سوا تین کپ

2 لیموں کا گودا

سوجی کی کریم یا پیسٹ 2 کپ

گندم کا آٹا 1/3 کپ

مکھن پگھلا ہوا 4 کھانے کے چمچ

گاڑھی کریم ایک کپ (ایک چمچ چینی ملالیں)

کٹا ہوا ڈرائی فروٹ 1/4 کپ

ترکیب

سب سے پہلے سیرپ تیار کریں، جس کے لیے چینی، پانی اور لیموں کا جوس ایک برتن میں ڈال کر 15 منٹ تک ابالیں۔

اس کے بعد اس سیرپ کو فریج میں ٹھنڈا ہونے کے لیے رکھ دیں۔

ایک علیحدہ برتن میں انڈوں کی زردی نکال کر لیموں کے گودے اور چینی کے ساتھ الیکٹرک چولہے پر 5 منٹ تک پکائیں ( گیس کے چولہے پر اپنے حساب سے اس وقت تک پکائیں جب تک اجزاء کا رنگ زرد نہ ہوجائے)

پھر اس میں سوجی کی کریم یا پیسٹ اور آٹا ڈال کر اسے اچھی طرح سے مکس کرکے سائیڈ میں رکھ دیں۔

انڈے کی سفیدی کو ایک الگ برتن میں رکھ دیں (چاہیں تو سفیدی کو مکھن کے ساتھ بھی مکس کریں)

پھر ڈرائی فروٹ اور کریم کے علاوہ تمام چیزیں مکس کرکے ایک 10 بائی 12 انچ کے بیکنگ پین میں ڈال کر 40 منٹ تک اوون میں رکھ دیں۔

اس کے بعد بیکنگ پین کو نکال کر، گرم کیک کے اوپر تیار کردہ سیرپ ڈال دیں۔

جب کیک ٹھنڈا ہوجائے اور سیرپ اس میں جذب ہوجائے تو کیک کو ٹکڑوں میں کاٹ کر اسے کریم اور ڈرائی فروٹ سے ڈیکوریٹ کردیں اور کھانے کے لیے پیش کریں۔