• گوگل پکسل سیریز
• ہیواوے پی 10
• ون پلس 5
• ایچ ٹی سی یو 11
• ایل جی جی سکس
• گلیکسی ایس ایٹ سیریز

ہر ماہ کئی نئے اسمارٹ فونز سامنے آتے ہیں جن میں سے انتخاب کرنا مشکل ہوتا ہے۔

2017 میں بھی بہت سے بہترین اسمارٹ فونز سامنے آئے۔

برطانوی روزنامے ٹیلیگراف نے رواں سال کے لیے اب تک کے بہترین اسمارٹ فونز کا انتخاب کیا ہے جو ہوسکتا ہے آپ کو بھی پسند آئیں۔

گوگل پکسل سیریز

5 اور 5.5 انچ کے یہ دو فونز 12 میگا پکسلز کیمرے کے ساتھ ہیں جنھیں گوگل نے اب تک کے سب سے بہترین اسمارٹ فون کیمرے قرار دیا ہے، اس کی بیٹری 26 گھنٹے کے ٹاک ٹائم کی طاقت رکھتی ہے جبکہ اس میں گوگل ڈیجیٹل اسسٹنٹ، لامحدود فوٹوز اور ویڈیوز کی اسٹوریج اور اینڈرائیڈ آپریٹنگ سسٹم جیسے بہترین فیچرز دستیاب ہیں۔

ہیواوے پی 10

دیکھنے میں یہ فون گزشتہ سال کے ماڈل پی نائن سے کچھ زیادہ مختلف نہیں، بس ڈیزائن میں کچھ معمولی تبدیلیاں کی گئی ہیں جبکہ قیمت کے لحاظ سے بھی یہ سام سنگ کے گلیکسی ایس سیریز اور آئی فون سے کافی سستا ہے، لیکن فیچرز کے لحاظ سے ان کی ٹکر کا ہے۔ آسان الفاظ میں جو لوگ آئی فون یا سام سنگ کے گلیکسی ایس 7 یا 8 کو خرید نہیں سکتے تو یہ فون اپنے فیچرز کے لحاظ سے ان سے کم نہیں جبکہ اس کی قیمت ہزاروں روپے کم ہوگی۔ ہیواوے پی 10 میں فل ایچ ڈی 5.2 انچ جبکہ پی ٹین پلس 5.5 انچ ٹو کے اسکرین کے ساتھ ہے جو کہ لگ بھگ قوس و قزح جتنے رنگوں میں دستیاب ہوگا۔

ون پلس 5

یہ اس کمپنی کا سب سے پتلا اور بہتر ڈیزائن والا فون ہے جس کی موٹائی محض 7.25 ملی میٹر ہے۔ فون کی تیاری کے لیے کمپنی نے المونیم باڈی کو استعمال کیا ہے جبکہ انٹینا بینڈز کو کم کرکے ڈوئل ریئر کیمرے کو فون کے کونے پر رکھا گیا ہے۔ 5.5 انچ کے اس فون میں فل ایچ ڈی ریزولوشن ڈسپلے دیا گیا ہے جبکہ 2.5 ڈی کورننگ گوریلا گلاس بھی فرنٹ پر موجود ہے۔ یہ فون فیچرز کے لحاظ سے سام سنگ کے گلیکسی ایس ایٹ کی ٹکر کا ہے مگر قیمت میں لگ بھگ پچاس فیصد سستا ہے۔

ایچ ٹی سی یو 11

ایچ ٹی سی یو 11 کا سب سے منفرد فیچر اسکوئز یا اپنی مٹھی کے دباﺅ سے اسے استعمال کرنا ہے۔ اس فون کے دونوں اطراف پریشر سینسیٹو سنسر موجود ہیں جو آپ کی گرفت کی مضبوطی کے مطابق وہ ایپ کھول دیں گے جو آپ پروگرام میں سیٹ کریں گے۔ آسان الفاظ میں آپ کیمرہ اوپن کرسکتے ہیں، دوبارہ دبا کر تصویر لے سکتے ہیں، کچھ دیر تک دبا کر فلیش لائٹ اوپن یا بند کرسکتے ہیں، وائی فائی کو آن کرسکتے ہیں یا وائس ریکارڈنگ۔ یہ ایسا فیچر ہے جو فی الحال ایپل، سام سنگ یا ہیواوے سمیت کسی بھی دیگر اسمارٹ فون کمپنی کی ڈیوائسز میں دستیاب نہیں اور ایچ ٹی سی نے اسے ایچ سنس کا نام دیا ہے۔

ایل جی جی سکس

ایل جی کا یہ فون اپنی طرز کا منفرد فون ہے کیونکہ اس کی 5.7 انچ کی اسکرین 5.2 باڈی میں دی گئی ہے جو دیکھنے میں متاثر کن ہے اور بڑی اسکرین والے فونز کے مقابلے میں چھوٹی لگتی ہے۔ 2880x1440 پکسل والی اسکرین گوریلا گلاس شیل کے ساتھ ہے جس میں غیر معمولی 18:9 ریشو ڈسپلے دیا گیا ہے جبکہ کواڈ ڈی اے سی سسٹم گزشتہ سال کے ایل جی وی 20 جیسا ہے۔ اس میں ایل جی نے 13 میگاپکسل کے ڈوئل کیمرے کو بیک پر دیا ہے، جسے جی فائیو کے مقابلے میں زیادہ پتلا بنایا گیا ہے۔

گلیکسی ایس ایٹ سیریز

اگر یہ کہا جائے کہ یہ اس وقت دستیاب سب سے خوبصورت فون ہے تو غلط نہیں ہوگا، ایج ٹو ایج یا بیزل لیس ڈسپلے، واٹر اور ڈسٹ ریزیزٹنٹ، 64 جی بی انٹرنل اسٹوریج، فور جی بی ریم کے ساتھ یہ انتہائی تیز پرفارمنس کا حامل ہے، جس کی اسکرین کوالٹی اعلیٰ اور ڈیزائن مسحور کردینے والا ہے۔