چارسدہ: خیبر پختونخوا کے ضلع چارسدہ کے قریب دریائے کابل پر سردریاب کے مقام پر پُل گرنے کے نتیجے میں ایک شخص جاں بحق جبکہ 2 زخمی ہوگئے۔

سردریاب پر واقع چیک پوسٹ کے انچارج اسسٹنٹ سب انسپکٹر (اے ایس آئی) صیام کے مطابق حادثہ اُس وقت پیش آیا جب سیمنٹ سے بھرا ایک ٹرک پُل سے گزر رہا تھا۔

16 سو سیمنٹ کی بوریوں سے لدا 10 وہیلر ٹرک پشاور سے چارسدہ جا رہا تھا۔

یہ بھی پڑھیں: شانگلہ:پل گرنے سے گاڑی میں سوار 8 افراد جاں بحق

حادثے میں زخمی ہونے والے افراد کو طبی امداد کی فراہمی کے لیے فوری طور پر چارسدہ ہسپتال منتقل کردیا گیا۔

ہسپتال ذرائع کے مطابق حادثے میں متاثر ہونے والے تینوں افراد ٹرک میں سوار تھے تاہم اب تک ان کی شناخت نہیں کی جاسکی۔

پل کا ایک حصہ گرنے کے بعد ٹریفک کی روانی متاثر ہوگئی جس کے بعد گاڑیوں کو یکطرفہ روڈ پر منتقل کردیا گیا۔

واضح رہے کہ پشاور کو ضلع چارسدہ سے منسلک کرنے والا یہ پُل 1939 میں قائم ہوا تھا اور اس کی حالت انتہائی مخدوش تھی۔