• یہ بھی پڑھیں: ٹینس سپر اسٹار سرینا ولیمز آج رشتہ ازدواج میں بندھ جائیں گی
• مزید پڑھیں: سرینا ولیمز نے جیون ساتھی چن لیا

متعدد بار عالمی نمبر ایک رہنے والی امریکی ٹینس اسٹار سیرینا ولیمز رشتہ ازدواج میں بندھ گئیں۔

انہوں نے اپنے دیرینہ دوست اور منگیتر 34 سالہ ایلکس اوہانیان سے شادی کی۔

ان کی شادی کی پر تعیش تقریب ریاست لویزیانا کے شہر نیو اورلینز کے آرٹس کمپلیکس میں ہوئی، جس میں شوبز، اسپورٹس، سیاست و ٹیکنالوجی کے شعبوں سمیت دیگر شعبوں کی اعلیٰ شخصیات نے شرکت کی۔

یہ بھی پڑھیں: ٹینس سپر اسٹار سرینا ولیمز آج رشتہ ازدواج میں بندھ جائیں گی

غیر ملکی خبر رساں ادارے ’اے ایف پی‘ نے برطانوی اخبار ڈیلی میل اور امریکی ‘پیپلز میگزین‘ کا حوالہ دیتے ہوئے اپنی خبر میں بتایا کہ سیرینا ولیمز اورایلکس اوہانیان کی شادی کی تقریب میں 250 اعلیٰ شخصیات نے شرکت کی۔

شادی کی تقریب میں میڈیا نمائندوں یا فوٹوگرافرز کو جانے کی اجازت نہیں تھی، جس وجہ سے تقریب کی زیادہ تفصیلات سامنے نہیں آ سکیں۔

تاہم اے ایف پی نے اس آرٹس کمپلیکس کے باہر کی تصاویر جاری کی ہیں، جہاں شادی کی تقریب منعقد کی گئی۔

مزید پڑھیں: سرینا ولیمز نے جیون ساتھی چن لیا

ان تصاویر میں شادی کے انتظامات اور مہمانوں کی آمد و رفت کو دیکھا جا سکتا ہے۔

دوسری جانب برطانوی اخبار ڈیلی میل اور دیگر اخبارات نے سیرینا ولیمز اور الیکس اوہانیان کی شادی تقریب میں شرکت کرنے والی بعض شخصیات کی تصاویر بھی شائع کی ہیں۔

میڈیا رپورٹس کے مطابق شادی کی تقریبات میں معروف گلوکارہ بیونسے، ان کے شوہر موسیقار جے زیڈ، ٹی وی و فیشن سلیبرٹی کم کارڈشین، ایوا لنگوریا، ٹینس اسٹار کیرو لینا وزونک، اینا ونٹور، وینس ولیمز سمیت دیگر اعلیٰ شخصیات شامل ہوئیں۔

خیال رہے کہ 36 سالہ سیرینا ولیمز اور 34 سالہ ایلکس اوہانیان کی منگنی 2015 میں ہوئی تھی، ٹینس اسٹار کے ہاں رواں برس یکم ستمبر کو بیٹی کی پیدائش بھی ہوئی تھی۔

سیرینا ولیمز نے رواں برس حاملہ ہونے کے باوجود آسٹریلین اوپن ٹینس کا ٹائیٹل جیت کر سب کو حیران کر دیا تھا۔