انڈونیشیا کے جزیرے بالی میں کئی روز سے دی جانے والی وارننگ کے بعد آخر کار پہاڑ سے آتش فشاں پھٹ پڑا۔

اس پہاڑ کا نام آگنگ ہے جس سے نکلنے والا دھواں چار ہزار میٹر تک اوپر اٹھا۔

خیال رہے کہ آخری مرتبہ یہ 1963 میں پھٹا تھا جس کے نتیجے میں تقریباً 1600 سے زائد افراد ہلاک ہوئے تھے اور کئی گاؤں تباہ ہو گئے تھے۔

انتظامیہ نے پہاڑ کے 8 کلو میٹر کے دائرے میں رہنے والے افراد کو حکم دے رکھا ہے کہ وہ اپنے گھر بار چھوڑ کر علاقہ خالی کر دیں۔

اس دوران کئی افراد کو ماسک بھی دیے گئے تاکہ وہ راکھ سے محفوظ رہیں۔

انڈونیشیا کا یہ جزیرہ جنوب مشرقی ایشیا میں سیاحت کے حوالے سے ایک اہم مقام مانا جاتا ہے، اور مغربی ملکوں سے ہزاروں سیاح یہاں ہر سال آتے ہیں۔