• یہ بھی پڑھیں: اسٹار وارز’دی لاسٹ جیڈی‘ کا ٹریلر جاری
• مزید پڑھیں: ’اسٹار وارز 8‘ کے کردار

ویسے تو امریکی ایپک اسپیس اوپرا فلم سیریز’اسٹارز وارز‘ کی آٹھویں فلم ’دی لاسٹ جیڈی‘ کوآج یعنی 15 دسمبر کو دنیا بھر میں ریلیز کیا جائے گا، تاہم اب اسے خلا میں بھی دکھایا جائے گا۔

جی ہاں، امریکا کے خلائی تحقیقاتی ادارے’ناسا‘ نے کہا ہے کہ وہ’اسٹار وارز: دی لاسٹ جیڈی کی’انٹرنیشنل اسپیس اسٹیشن‘ (آئی ایس ایس) میں خصوصی اسکریننگ کی جائے گی۔

رواں برس کے موسم سرما کا یہ پہلا موقع ہوگا کہ ’عالمی خلائی اسٹیشن‘ پر فلم کو دکھایا جائے گا۔

برطانوی اخبار ’دی انڈپینڈنٹ‘ کے مطابق ناسا کے پبلک افیئرآفیسر ڈین ہوٹ نے بتایا کہ ’اسٹار وارز: دی لاسٹ جیڈی‘ کو خصوصی طور پر خلائی اسٹیشن میں دکھایا جائے گا۔

یہ بھی پڑھیں: اسٹار وارز’دی لاسٹ جیڈی‘ کا ٹریلر جاری

تاہم ڈین ہوٹ نے یہ نہیں بتایا کہ فلم کو کب اور کیسے دکھایا جائے گا۔

ڈین ہوٹ نے کہا کہ یہ ابھی کہنا قبل از وقت ہے کہ اسٹار وارز کو کب دکھایا جائے گا، تاہم یہ طے ہے کہ عالمی خلائی اسٹیشن پر اس کی خصوصی اسکریننگ ہوگی۔

خیال رہے کہ اسٹار وارز: دی لاسٹ جیڈی‘ اسی سیریز کی 8 ویں فلم ہے، جسے دنیا بھر میں آج ریلیز کیا جا رہا ہے۔

مزید پڑھیں: ’اسٹار وارز 8‘ کے کردار

خیال کیا جا رہا ہے کہ ’اسٹار وارز‘ ریلیز کے پہلے ہی دن ریکارڈ کمائی کرکے سیریز کی پرانی فلموں کی کمائی کا ریکارڈ توڑ دے گی۔

’دی لاسٹ جیڈی‘ کی خاص بات یہ ہے کہ اس فلم میں کیری فشر آخری بار نظر آئیں گی، فلم کی شوٹنگ کے دوران ہی وہ چل بسیں تھیں، اسٹار وارز کی اس فلم میں ان کی جگہ اکیڈمی ایوارڈ یافتہ لورا ڈیرن نے لی ہے۔

پروڈیوسر کیتھالین کینیڈی اور رام برگمن کی فلم ’دی لاسٹ جیڈی‘ کی ہدایات ریان جوہنسن نے دی ہیں۔

فلم کو والٹ ڈزنی اسٹوڈیوز اور موشن پکچرز کے بینر تلے ریلیز کیا جائے گا، فلم کی کاسٹ میں مارک ہیمل، ایڈم ڈرائیور، ڈیسے رائڈلے، اوسکر ایساک، لپیتا نویونگو و دیگر شامل ہیں۔