اپنا خود کا گھر بنانا شاید ہر کسی کا خواب ہوتا ہے اور اگر فلمی اسٹارز کی بات کی جائے تو کامیابی کے بعد ان کی خواہش بھی یہی ہوتی ہے وہ اپنا خود کا مکان تیار کریں۔

اگر بات بولی وڈ اداکار ورن دھون کی کریں تو شاید ان کا بھی بولی وڈ انڈسٹری میں شامل ہونے کے بعد ایک خواب اپنا خود کا گھر بنانا تھا جسے آخر کار انہوں نے پورا بھی کرلیا۔

ویسے تو ورن دھون خان شمار اس وقت بولی وڈ کے کامیاب اداکاروں میں کیا جارہا ہے اور ان کے والد بھی اس انڈسٹری کے امیر ترین ہدایت کار مانے جاتے ہیں، البتہ ورن کو اداکاری شروع کیے ہوئے زیادہ وقت نہیں گزرا۔

مزید پڑھیں: ورن دھون کے نام ایک بڑا اعزاز

انہوں نے بولی وڈ میں اپنے کیریئر کا آغاز 2012 کی فلم ’اسٹوڈنٹ آف دی ایئر‘ کے ساتھ کیا تھا، جس کے بعد وہ کئی کامیاب فلموں میں جلوہ گر ہوئے۔

انڈسٹری میں اتنی کامیابی حاصل کرنے کے بعد آخر کار ورن دھون نے اپنا خود کا شاندار گھر تیار کرلیا، جس کی ویڈیو معروف اداکار اور ورن کے والد کے قریبی دوست انوپم کھیر نے اپنے سوشل میڈیا اکاؤنٹ پر شیئر کی۔

انوپم کھیر نے یہ ویڈیو اس وقت بنائی جب ورن کے نئے گھر میں کوئی تقریب جاری تھی، اس دوران انہوں گھر کا ہر حصہ مداحوں کو دکھایا جبکہ یہ بھی کہا کہ انہیں ورن پر فخر ہے۔

اس ویڈیو میں ورن دھون کے والد ڈیوڈ دھون میں نظر آئے۔

خیال رہے کہ ڈیوڈ دھون اور انوپم کھیر نے ایک ساتھ شعلہ اور شبنم، حسینہ مان جائے گی جیسی فلموں میں کام کیا۔

جبکہ ورن دھون اور انوپم کھیر میں تیرا ہیرو اور جڑواں 2 میں ایک ساتھ کام کرچکے ہیں۔

واضح رہے کہ ورن دھون کے علاوہ حال ہی میں رنبیر کپور نے بھی اپنا خود کا گھر ممبئی میں بنوایا، جس کو شاہ رخ خان کی اہلیہ گوری خان نے ڈیزائن کیا۔

البتہ ورن دھون کے گھر کو ان کی والدہ نے ہی ڈیزائن کیا۔

بولی وڈ اداکاروں کے لیے اپنا خود کا شاندار گھر تیار کرنا شاید بےحد ضروری ہے، اس کی ایک مثال شاہ رخ خان گھر ’منت‘ ہے جبکہ امیتابھ بچن نے اپنے گھر کو ’جلسہ‘ کا نام دیا ہے۔