وزیر داخلہ سندھ سہیل انور سیال نے رواں ہفتے شارع فیصل پر شہریوں سے لوٹ مار میں ملوث مبینہ ملزمان کے خلاف پولیس مقابلے میں جاں بحق ہونے والے مقصود کا بے گناہ قرار دے دیا۔

وزیر داخلہ نے میڈیا سے گفتگو کرتے ہوئے بتایا کہ 'میں نے جائے وقوع کی سی سی ٹی وی فوٹیج چیک کرنے کی ہدایت کی ہے، مقصود کے جاں بحق ہونے کی تحقیقاتی کرائیں گے اور مقصود کے اہل خانہ کو ہر سطح پر مطمئن کریں گے۔

ان کا کہنا تھا کہ ایک کے بعد ایک واقعہ تواتر کے ساتھ ہو رہا ہے، پولیس جان بوجھ کر ایسے کام نہیں کرے گی۔

مزید پڑھیں: کراچی: شارع فیصل پر لوٹ مار کرنے والا گروہ گرفتار

انہوں نے مزید کہا کہ یہ تاثرغلط ہے کہ حکومت کسی کو بچانے کی کوشش کررہی ہے۔

خیال رہے کہ رواں ہفتے 20 جنوری کو کراچی کے علاقے شارع فیصل پر شہریوں سے لوٹ مار میں ملوث مبینہ ملزمان پولیس مقابلے کے بعد زخمی حالت میں گرفتار کیے گئے تھے جبکہ ایک راہ ہلاک ہوگیا تھا۔

پولیس ذرائع کے مطابق ہلاک ہونے والا محمد مقصود پولیس کی جانب سے کی گئی گولیوں کی زد میں آکر ہلاک ہوا تھا۔

یہ بھی پڑھیں: کراچی: ڈکیتی کی وارداتوں میں تاجر کے علاوہ تین ڈاکو ہلاک

بعد ازاں انسپیکٹر جنرل (آئی جی) سندھ کی شارع فیصل پر سفید کرولا گینگ کے خلاف اچھی کارکردگی پر پولیس پارٹی کو شاباش دی۔

انہوں نے شارع فیصل پولیس مقابلے کے بعد ملزمان کو گرفتار کرنے پر دو لاکھ روپے انعام کا اعلان کردیا۔