لبنان کے وزیر اعظم سعد حریری نے گزشتہ سال سعودی عرب میں استعفیٰ کا اعلان کرنے کے بعد سعودی ریاست کا پہلا دورہ کیا جس میں انھوں نے سعودی فرمانروا شاہ سلمان سے ملاقات کی۔

فرانسیسی خبر رساں ادارے کی رپورٹ کے مطابق سعودی عرب کے ریاستی خبر رساں ادارے ایس پی اے کا کہنا تھا کہ سعد حریری اور شاہ سلمان نے ملاقات کے دوران دو طرفہ تعلقات اور لبنان میں ہونے والی ترقیاتی امور پر تبادلہ خیال کیا۔

علاوہ ازیں لبنانی وزیر اعظم کی سعودی ولی عہد محمد بن سلمان سے ملاقات بھی متوقع ہے۔

واضح رہے کہ سعودی عرب کے قریبی سعد حریری نے 4 نومبر کو اچانک اپنے عہدے سے استعفیٰ دیتے ہوئے کہا تھا کہ ’میں نے اپنی زندگی کو ٹارگٹ کرنے کے لیے بنائے گئے پوشیدہ منصوبے کو محسوس کر لیا ہے۔‘

سعد حریری کی جانب سے اپنے عہدے سے استعفے کے اعلان کے بعد لبنان میں سیاسی بحران شدت اختیار کرگیا تھا جبکہ حکام کی جانب سے سعودی عرب پر وزیراعظم کی حراست کے حوالے سے سوالات اٹھائے گئے تھے جہاں وہ مستعفی ہونے کے بعد دو ہفتوں تک رہے تھے۔

مزید پڑھیں: حزب اللہ کا سعودی عرب پر لبنانی وزیرِاعظم کی گرفتاری کا الزام

تاہم سعد حریری نے سعودی عرب کی جانب سے حراست میں رکھنے کی افواہوں کو رد کر دیا تھا اور فرانس کی دعوت پر پیرس کے دورے کے لیے 18 نومبر کو سعودی عرب چھوڑنے کا اعلان کیا۔

سعد حریری اپنے دورہ فرانس کے بعد مصر اور قبرص میں رکے اور وہاں سے بیروت پہنچے اور ملک کے 74 یوم آزادی کے جشن کے موقع پر سامنے آئے اور میڈیا سے بات چیت کی۔

بعد ازاں انہوں نے لبنانی صدر میشال عون کی درخواست پر اپنے استعفے کے فیصلے کو معطل کرنے پر اتفاق کیا تھا۔