معروف سوشل میڈیا اسٹار شام ادریس ایک کار حادثے کے نتیجے میں شدید زخمی ہوگئے جس کی ویڈیو سوشل میڈیا پر وائرل ہے۔

اس حادثے کے دوران شام ادریس کے ساتھ ان کی دوست فاطمہ جنہیں فروگی بلایا جاتا ہے اور چوچی نامی دوست بھی موجود تھے۔

کینیڈا میں مقیم 29 سالہ شام ادریس کے یوٹیوب اکاؤنٹ پر اس واقع کی ویڈیو بھی شیئر کی گئی، جسے دیکھ کر اندازہ ہورہا ہے کہ اس حادثے میں شام ادریس کی گاڑی کے علاوہ تین سے چار گاڑیاں اور بھی حادثے کا شکار ہوئیں۔

یہ حادثہ صبح 6 بجے کے قریب ہوا جب شام ادریس کی گاڑی تیز رفتاری کے باعث سڑک پر دوسری گاڑی سے ٹکرا گئی۔

ویڈیو میں شام اپنے ساتھیوں کے ساتھ موجود ہیں، جبکہ ان کی زبان سے خون بہہ رہا ہے۔

اس کے بعد ان تینوں کو فوری طور پر ہسپتال منتقل کردیا گیا۔

بعدازاں شام ادریس کے ٹوئٹر اکاؤنٹ پر بھی ایک بیان جاری ہوا جس میں بتایا گیا کہ انہیں زبان کے ساتھ ساتھ سیدھے ہاتھ اور ٹانگ پر چوٹیں آئیں ہیں، جبکہ فروگی اور چوچی بھی اس حادثے میں معمولی زخمی ہوئے ہیں۔

خیال رہے کہ شام ادریس اپنے ساتھیوں کے ساتھ مل کر طویل عرصے سے یوٹیوب پر مزاحیہ ویڈیو بلاگز (وی لاگز) اپ لوڈ کررہے ہیں۔

ان کے یوٹیوب اکاؤنٹ کو 10 لاکھ سے زائد افراد فالو کررہے ہیں۔

یاد رہے کہ شام ادریس مشہور کامیڈین زید علی کے بھی کافی اچھے دوست مانے جاتے ہیں۔