گوگل کی جانب سے ای میل سروس جی میل کے ویب ورژن کے نئے ڈیزائن کو جلد متعارف کرایا جائے گا، جس کے نئے ڈیزائن کی تصاویر گزشتہ روز سامنے بھی آئی تھیں۔

مزید پڑھیں : گوگل جی میل کا ری ڈیزائن ورژن متعارف کرانے کے لیے تیار

اب ایک رپورٹ میں دعویٰ کیا گیا ہے کہ اس نئے جی میل میں ایک دلچسپ فیچر بھی سامنے آنے والا ہے، جس کی مدد سے لوگ ایسی ای میلز ارسال کرسکیں گے جو ایک خاص وقت کے بعد خودکار طور پر ڈیلیٹ یا غائب ہوجائیں گی۔

ویسے تو کسی ای میل سروس کے لیے تمام تر ای میل سروسز اور ای میل کلائنٹس سے مطابقت پیدا کرنا بہت مشکل ہوتا ہے مگر پھر بھی گوگل سادہ POP3/IMAP/SMTP پروٹوکول کو پیچھے چھوڑنے کے لیے تیار ہے۔

یہ بھی پڑھیں : جی میل کا یہ فیچر آپ کو معلوم ہے؟

لیک ہونے والے اسکرین شاٹس سے اندازہ ہوتا ہے کہ ایک خاص وقت کے بعد ای میل ایکسپائر ہوجائیں گی اور انہیں پڑھنا ممکن نہیں ہوگا۔

اس فیچر کے تحت ای میل کمپوز کرتے ہوئے ایک ننھا تالے کا آئیکون 'کانفیڈنشنل موڈ' کے نام سے ہوگا، جس کو اپلائی کرنے پر جس فرد کے پاس وہ ای میل جائے گی، وہ اس کا مواد آگے فارورڈ، کاپی ، پیسٹ، ڈاﺅن لوڈ یا پرنٹ نہیں کرسکے گا۔

اسی طرح بھیجنے والا صارف ای میل کی ایکسپائری ڈیٹ بھی طے کرسکیں گے جو کہ ایک ہفتہ، ایک ماہ، کئی سال وغیرہ ہوسکتی ہے۔

اسی طرح بھیجنے والا موصول کرنے کی شناخت کی تصدیق پاس کوڈ کے ذریعے کرسکے گا۔

ابھی یہ واضح نہیں کہ یہ فیچر جی میل سے ہٹ کر دیگر ای میل سروسز پر کام کرے گا یا نہیں کیونکہ اس کے لیے کانفیڈنشنل میسج دیکھنے کے لیے گوگل اکاﺅنٹ پر دوبارہ لاگ ان ہونا پڑے گا۔