عید کے موقع پر پاکستانی سینما گھروں میں بولی وڈ فلموں پر لگی پابندی سے ہندی سینما کے مداح کافی ناخوش دکھائی دیے، جس کے بعد وزارت اطلاعات نے نیا نوٹیفیکیشن جاری کرتے ہوئے بولی وڈ فلموں کی پابندی کا دورانیہ 2 ہفتوں سے کم کرکے ایک ہفتہ کردیا۔

اس سے قبل سنسر بورڈ کی جانب سے جاری کردہ نوٹیفکیشن میں واضح کیا گیا تھا کہ یہ پابندی مستقل نہیں، بھارتی فلموں پر پابندی کا اطلاق عید سے 2 دن پہلے شروع ہوگا اور عید کے بعد 2 ہفتوں تک جاری رہے گا۔

مزید پڑھیں: پاکستان میں عید پر بھارتی فلموں کی نمائش پر پابندی

تاہم نئے نوٹیفیکیشن میں واضح کیا گیا ہے کہ اس پابندی کا آغاز عید الفطر اور عید الاضحیٰ کے روز سے ہوگا، جس کا دورانیہ صرف ایک ہفتہ رہے گا۔

بولی وڈ فلموں پر پابندی عائد کرنے کا مقصد پاکستانی فلم انڈسٹری کو سپورٹ کرنا اور پاکستانی فلمز کی زیادہ مقبولیت ہے۔

عید الفطر کے دوران پاکستانی سینما گھروں میں ’سات دن محبت ان‘، ’وجود‘، ’نہ بینڈ نہ باراتی‘ اور ’آزادی‘ جیسی مقامی فلمیں ریلیز ہو رہی ہیں۔

جبکہ ایک ہفتے بعد پاکستانی فلموں کا مقابلہ سلمان خان کی فلم ’ریس 3‘ سے ہوگا، جس کے چند روز بعد رنبیر کپور کی فلم ’سنجو‘ بھی ریلیز کردی جائے گی۔