روزانہ کی بنیاد پر لاکھوں کی تعداد میں ویڈیوز اور پوسٹ سوشل میڈیا پر شیئر کی جاتی ہیں اور ہمیں دنیا بھر میں ہونے والے انوکھے واقعات اور دلچسپ معلومات جاننے کا موقع ملتا ہے۔

اسی طرح کرکٹ کی بیش بہا صلاحیتوں سے لیس ایک 10سالہ پاکستانی بچے کی ویڈیو سوشل میڈیا پر پوسٹ کی گئی ہے جس نے قومی ٹیم کے سابق اور موجود کھلاڑیوں کی توجہ بھی حاصل کرلی۔

یہ ویڈیو سوشل میڈیا پر کافی مقبول ہورہی ہے جس میں ننھے اسٹار کو بیٹنگ کرتے ہوئے دیکھا جاسکتا ہے، اپنی عمدہ تکنیک اور بہترین دفاع کی حامل بیٹنگ سے اس بچے نے سب کے دل جیت لیے۔

جنوبی پنجاب کے شہر رینالہ سے تعلق رکھنے والے بچے نے یکساں مہارت کے ساتھ تمام اسٹروک کھیلے جس پر قومی ٹیم کے اسٹارز بھی اسے داد دیے بغیر نہ رہ سکے۔

قومی ٹیم کے مایہ ناز وکٹ کیپر بلے باز کامران اکمل نے کہا کہ یہ بچہ اصل ٹیلنٹ ہے، نیشنل کرکٹ اکیڈمی کو اس بچے کو ہر حال میں دیکھنا چاہیے، یہ مستقبل میں ایک ورلڈ کلاس بلے باز اور پاکستان کا اثاثہ بن سکتا ہے لہٰذا اسے ضائع نہ کیا جائے۔

سابق ٹیسٹ کرکٹ عتیق الزمان بھی ننھے کرکٹر کی تعریف کیے بنا نہ رہ سکے اور شاندار شاٹس کھیلنے پر داد دی۔