33 سالہ اداکار نے بتایا کہ انہوں نے شادی کا فیصلہ کرلیا ہے اور وہ 40 سال کی عمر تک پہنچنے سے قبل ہی شادی کرلیں گے۔

فلم فیئر کو دیے گئے خصوصی انٹرویو میں سدرھاتھ ملہوترا نے بتایا کہ کس طرح وہ ایک عام شخص سے اداکار بنے اور پھر کیسے ایک کے بعد ایک فلم کے کامیاب ہونے پر وہ مشہور بنے۔

سدھارتھ ملہوترا کے مطابق وہ انتہائی کم عمری میں ہی ممبئی آگئے تھے اور وہ اپنے تمام اخراجات خود کرتے تھے۔

ایکشن ہیرو کے مطابق انہیں اداکار بنانے میں کرن جوہر کا ہاتھ ہے، اگر انہیں دھرما پروڈکشن کی فلم ‘اسٹوڈنٹ آف دی ایئر’ میں کام نہیں ملتا تو وہ آج اداکار نہ ہوتے۔

اپنی پہلی فلم کے ساتھ اداکاروں ورون دھون اور عالیہ بھٹ کے حوالے سے بھی انہوں نے خصوصی بات کی اور اعتراف کیا کہ وہ تینوں بہترین دوست ہیں۔

اس سوال پر کہ کیا وہ بھی عالیہ بھٹ کو محض دوست ہی سمجھتے ہیں یا پھر اس سے آگے کا معاملہ ہے پر سدھارتھ ملہوترا کا کہنا تھا کہ وہ بھی اداکارہ کو دوست ہی سمجھتے ہیں۔

سدھارتھ ملہوترا نے مہارت سے عالیہ بھٹ کے ساتھ اپنے افیئر کی بات کو چھیڑے بغیر کہا کہ وہ ایک دوسرے سے کئی باتیں شیئر کرتے ہیں۔

ایک ساتھ ایک ہی فلم ‘اسٹوڈنٹ آف دی ایئر’ سے کیریئر کا آغاز کرنے اور پھر اب کامیاب بن جانے پر سدھارتھ ملہوترا نے کہا کہ عالیہ اور ورون دھون بھی ان کی طرح اپنا اپنا سفر جاری رکھے ہوئے ہیں۔

انٹرویو میں انہوں نے یہ بھی کہا کہ اگر بہت سارے لوگ چاہتے ہیں کہ ایک بار پھر وہ تینوں کسی فلم میں نظر آئیں، تاہم ایسا جلد ممکن دکھائی نہیں دیتا۔

پیار کیا ہوتا ہے کہ جواب میں سدھارتھ ملہوترا کا کہنا تھا کہ جب وہ کالج میں پڑھتے تھے تب لڑکا کا دیکھنا اور پھر مسکرا دینا ہی ان کی نظر میں پیار تھا، لیکن اب پروفیشنل زندگی میں اس کی تشریح کچھ اور ہے۔

اداکارہ کیارہ آڈوانی کے ساتھ افیئر کی زیر گردش خبروں کے حوالے سے سدھارتھ ملہوترا نے حیرانگی کا اظہار کرتے ہوئے کہا کہ بطور اداکار انہیں کیریئر کے آغاز سے ہی ایسی افواہیں سننے کو ملیں۔

اپنے انٹرویو میں اگرچہ انہوں نے کسی بھی اداکارے کے ساتھ اپنے تعلقات یا رومانس کا اعتراف نہیں کیا، تاہم انہوں نے بتایا کہ وہ 40 سال کے ہوجانے سے قبل ہی شادی کرلیں گے۔

خیال رہے کہ 2012 میں عالیہ بھٹ کے ساتھ پہلی فلم ‘اسٹوڈنٹ آف دی ایئر’ میں کام کرنے کے بعد ان کے تعلقات کی خبریں گردش کرتی رہیں۔

تاہم خبریں تھیں کہ عالیہ بھٹ کی جانب سے رنبیر کپور سے تعلقات قائم کیے جانے کے بعد سدھارتھ ملہوترا نے بھی اپنے راستے تبدیل کیے اور وہ جیکولین فرنانڈس کے قریب آگئے۔

جیکولین فرنانڈس کے ساتھ فلم ‘جنٹلمین’ میں کام کرنے کے دوران یہ خبریں سامنے آئیں کہ ان دونوں کے درمیان تعلقات ہیں، تاہم دونوں نے اس حوالے سے کبھی کوئی بات نہیں کی۔

گزشتہ چند ماہ سے سدھارتھ ملہوترا اور کیارہ آڈوانی کے تعلقات کے حوالے سے خبریں گردش میں ہیں۔

ٹائمز آف انڈیا کے مطابق دونوں کو متعدد بار ایک ساتھ دیکھا گیا اور انہیں بولی وڈ کی اگلی جوڑی کے طور پر دیکھا جا رہا ہے۔

علاہ ازیں سدھارتھ ملہوترا کا نام پرینیتی چوپڑا سے بھی جوڑا جاتا رہا ہے، جن کے ساتھ آج کل وہ اپنی آنے والی فلم ‘جبریاں جوڑی’ کی شوٹنگ میں مصروف ہیں۔