ہسپتال ذرائع کے مطابق چیف جسٹس اپنے اہل خانہ کے ہمراہ ہسپتال تشریف لائے، جہاں آر آئی سی کے سربراہ ڈاکٹر اظہر کیانی نے ان کا چیک اپ کیا۔

چیف جسٹس کے چیک اپ سے معلوم ہوا کہ ان کی دل کی ایک شریان بند ہے، جس پر ان کی انجیوپلاسٹی کی گئی جو کامیاب رہی۔

ذرائع کے مطابق چیف جسٹس کو مزید دیکھ بھال کے لیے ہسپتال میں داخل کرلیا گیا ہے، تاہم ان کی حالت خطرے سے باہر ہے اور وہ اپنے اہل خانہ سے بات چیت کر رہے ہیں۔

ڈاکٹر اظہر کیانی کے مطابق چیف جسٹس میاں ثاقب نثار کی انجیوپلاسٹی کی گئی اور دل کی ایک بند شریان کھول دی گئی،تاہم ڈاکٹر اظہر کیانی کا کہنا تھا کہ ہوسکتا ہے کہ چیف جسٹس کو ایک سے 2 روز کے لیے ہسپتال میں رکھا جائے۔

بعد ازاں جسٹس آصف سعید کھوسہ نے آر آئی سی میں چیف جسٹس کی عیادت بھی کی۔