کچھ دن قبل ہی سارہ علی خان نے جہاں اپنی سوتیلی والدہ کرینہ کپور کی تعریف کرتے ہوئے انہیں سب سے زیادہ پروفیشنل اداکارہ قرار دیا تھا۔

وہیں انہوں نے کرینہ کپور جیسی اداکارہ بننے کی خواہش کا اظہار بھی کیا تھا۔

اس بیان کے بعد سارہ علی خان گزشتہ ہفتے اپنے والد سیف علی خان کے ساتھ کرن جوہر کے پروگرام ’کافی ود کرن‘ میں شریک ہوئیں، جہاں انہوں نے بتایا کہ وہ کرینہ کپور کو ’ماں‘ نہیں کہ سکتیں۔

25 سالہ سارہ علی خان کا کہنا تھا کہ وہ اپنی 38 سالہ سوتیلی ماں کرینہ کپور کو ’آنٹی یا ماں’ کہیں گی تو انہیں برا لگے گا۔

یہ بھی پڑھیں: سارہ علی خان پیدائشی اداکارہ ہیں، کرینہ کپور

ساتھ ہی پروگرام میں سارہ علی خان نے اپنے والد کے سامنے ہی بتایا کہ اگر انہیں موقع ملا تو وہ اپنی سوتیلی ماں کرینہ کپور کے کزن رنبیر کپور سے شادی کرنا چاہیں گی۔

اس کے علاوہ سارہ علی خان نے یہ بھی کہا تھا کہ اگرچہ وہ شادی تو رنبیر کپور کے ساتھ کرنا چاہیں گی، تاہم وہ گہری دوستی نوجوان اداکار کارتک آریان سے کرنا چاہیں گی۔

سارہ علی خان کے ایسے بیانات کے بعد گزشتہ روز کرینہ کپور نے بھی خاموشی توڑی تھی اور کہا تھا کہ ان کے شوہر کی بڑی بیٹی پیدائشی اداکارہ ہیں۔

کرینہ کپور نے ممبئی میں فیشن شو کے بعد میڈیا سے بات کے دوران سارہ علی خان کی آنے والی فلم کے حوالے سے کہا تھا کہ انہیں توقع ہے کہ وہ اچھی فلم ہوگی۔

ساتھ ہی کرینہ کپور نے کہا تھا کہ سارہ علی خان کے والد اور والدہ امریتا سنگھ دونوں اداکار تھے، اس لیے وہ پیدائشی اداکار ہیں اور ان سے اچھی اداکاری کی توقع رکھی جانی چاہیے۔

مزید پڑھیں: سیف علی خان کی بیٹی رنبیر کپور کی دلہن بننے کی خواہاں

تاہم اب کرینہ کپور نے اپنی سوتیلی بیٹی سارہ علی خان اور ان کے چھوٹے بھائی اور سیف علی خان کے بڑے بیٹے 17 سالہ ابراہیم علی خان کے حوالے سے اہم بیان دے کر سب کو حیران کردیا۔

ہندوستان ٹائمز نے اپنی رپورٹ میں بتایا کہ جہاں کرینہ کپور نے ریڈیو پر اپنا پروگرام شروع کرتے ہی بولی وڈ میں شروع ہونے والی ’می ٹو’ مہم پر بات کی اور اسے اچھا قرار دیا۔

وہیں اداکارہ نے ایک اور خبر رساں ادارے کو دیے گئے انٹرویو میں بتایا کہ وہ اپنے شوہر کے سوتیلے بچوں کی ماں نہیں بن سکتیں۔

کرینہ کپور کا کہنا تھا کہ چوں کہ سارہ علی خان اور ابراہیم علی خان کی ماں امریتا سنگھ ایک بہت ہی اچھی والدہ ہیں، اس لیے وہ ان کی جگہ نہیں لے سکتیں، البتہ اپنے سوتیلے بچوں کی مشکل وقت میں مدد کر سکتی ہیں۔

تاہم بولی وڈ بیبو نے بتایا کہ انہیں تعجب ہوگا کہ اگر 25 سالہ سارہ علی خان اور 17 سالہ ابراہیم علی خان انہیں چھوٹی ماں کہ کر پکاریں۔

یہ بھی پڑھیں: کہا گیا شادی کے بعد مجھے کوئی کاسٹ نہیں کرے گا، کرینہ

کرینہ کپور نے انٹرویو میں واضح کیا کہ وہ سارہ علی اور ابراہیم علی خان کی اچھی دوست تو بن سکتی ہیں، تاہم ان کی ماں نہیں بن سکتیں۔

خیال رہے کہ سارہ علی اور ابراہیم علی اداکار سیف علی خان کے بڑے بچے اور ان کی پہلی بیوی اداکارہ امریتا سنگھ کے بچے ہیں۔ سیف علی خان اور امریتا سنگھ نے 1991 میں شادی کی جو 2004 میں طلاق پر ختم ہوئی۔

ان کی بیٹی سارہ علی خان کی پہلی فلم ’کیدر ناتھ’ آئندہ ماہ دسمبر میں ریلیز ہوگی، جب کہ بیٹے ابراہیم علی خان کے حوالے سے خبریں ہیں کہ وہ بھی جلد ہی فلم انڈسٹری کا حصہ بننے والے ہیں۔

سیف علی خان نے کرینہ کپور سے 2012 میں شادی کی اور 2016 میں ان کے ہاں بیٹا تیمور علی خان ہوا جو اس وقت 2 سال کا ہے۔