بابراعظم نے دبئی ٹیسٹ میں حارث سہیل کے ساتھ مل کر 186 رنز کی شراکت قائم کی تھی اور دونوں بلے بازوں نے اپنی سنچریاں مکمل کی تھی جہاں انہوں نے انتہائی سست بلے بازی کا مظاہرہ کیا تھا۔

پاکستان نے اپنی پہلی اننگز 5 وکٹوں پر 418 رنز بنا کر ڈیکلیئر کردی تھی۔

مزید پڑھیں:دبئی ٹیسٹ: پاکستان نے پہلی اننگز 418 رنز پر ڈیکلیئر کردی

بابراعظم نے 127 رنز کی اننگز میں 12 چوکے اور 2 چھکے لگائے تھے جبکہ 263 گیندوں کا سامنا کیا تھا۔

پاکستان کی کارکردگی پر اسپورٹس صحافی زینب عباس نے اپنی ٹویٹ میں بابر اعظم کی کارکردگی کی تعریف کرتے ہوئے کہا کہ ‘مجھے اچھا لگا جس طرح لڑکے اپنے بیٹے کی سنچری پر خوشی منانے والے مکی آرتھر کو مبارک باد دے رہےتھے’۔

زینب عباس کے اس ٹویٹ پر بابراعظم نے سخت جواب دیا۔

بابراعظم نے اپنی جوابی ٹویٹ میں کہا کہ ‘آپ کچھ کہنے سے قبل سوچ لیا کریں اور اپنی حد کو عبور کرنے کی کوشش نہ کریں’۔

نوجوان بلے باز کے اس جواب پر ان کے مداحوں اور صارفین کی ایک بڑی تعداد نے اس کو منہ توڑ جواب قرار دے دیا۔

ٹویٹر صارفین نے زینب عباس کو ہدف تنقید بنایا۔

صارفین نے اپنے تاثرات کا اظہار مختلف انداز میں کیا۔

بابراعظم کے مداحوں نے ان کے جواب کو خوب سراہا۔

دوسری جانب صحافیوں سمیت چند صارفین نے زینب عباس کی حمایت کرتے ہوئے اس کو غلط فہمی کا شاخسانہ قرار دیا۔

بابراعظم اور زینب عباس کے اس ٹویٹ پر چند مداحوں نے تجاویز بھی پیش کیں۔