بسمہ معروف کی شادی کی تقریب لاہور میں منعقد ہوئی جس میں عزیر و اقارب کے ساتھ ساتھ قومی ویمنز ٹیم کی کرکٹرز نے بھی شرکت کی۔

خاتون کرکٹر کی شادی ابرار احمد سے ہوئی ہے جو پیشے کے لحاظ سے انجینئر ہیں۔

گزشتہ روز بسمہ معروف کی مہندی کی تقریب میں بھی قومی ویمنز ٹیم کی کھلاڑیوں نے بھی شرکت کی۔

بسمہ معروف چند دن پہلے ورلڈ کپ میں شرکت کے بعد وطن واپس آئی تھیں۔

پاکستان کرکٹ بورڈ نے گزشتہ سال ثنا میر کی جگہ بسمہ کو قومی ٹیم کی قیادت سونپی تھی لیکن وہ رواں سال انجری کا شکار ہو گئیں اور قیادت جویریہ ودود کو سونپ دی گئی۔

انجری سے صحتیابی کے بعد بسمہ کو پاکستان کرکٹ بورڈ نے ویمنز ورلڈ ٹی20 کے لیے دوبارہ قیادت سونپنے کی پیشکش کی لیکن وہ اس سے رضاکارانہ طور پر دستبردار ہو گئیں اور ایونٹ میں جویریہ نے پاکستان کی قیادت کی تھی۔

بسمہ معروف 98 ون ڈے اور 92 ٹی20 میچوں میں پاکستان کی نمائندگی کا اعزاز رکھتی ہیں۔