دنیا بھر کی طرح پاکستان میں بھی نئے سال ‘2019’ کا استقبال آتش بازی، جشن، محافل موسیقی، روایتی رقص اور مختلف روایتی انداز میں کیا جارہا ہے۔

کراچی میں سی ویو پر نوجوانوں نے سماں باندھا جبکہ مختلف علاقوں میں کنسرٹ کا بھی اہتمام کیا گیا۔

لاہور اور اسلام آباد سمیت دیگر شہروں میں بھی نئے سال کو خوش آمدید کہا گیا۔

وزیر اعلیٰ سندھ سید مراد علی شاہ نے موٹر سائیکل کی ڈبل سواری پر سیکریٹری داخلہ کی جانب سے عائد پابندی ختم کرنے کا حکم دیا۔

وزیر اعلیٰ کے مشیر اطلاعات، قانون و اینٹی کرپشن مرتضیٰ وہاب نے نوجوانوں کو کہا کہ نئے سال کی آمد کی خوشی صوبائی حکومت بھرپور طریقے سے منائے گی اور حکومت کی طرف سے ساحل پر آتش بازی کا اہتمام کیا گیا ہے۔

ان کا کہنا تھا کہ ساحل سمندر کو شہریوں کے لیے بند کرنے کا کوئی فیصلہ نہیں کیا گیا، ساحل سمندر پر جانے کے لیے بلاول ہاؤس اور سعودی قونصل خانے سے جانے والے راستے کھلے ہوں گے اور شہری نئے سال کی خوشیاں آزادانہ طور پر منا سکتے ہیں۔

مرتضیٰ وہاب کا کہنا تھا کہ سمندر میں نہانے پر پابندی ہے لیکن وہاں جانے پر کوئی پابندی نہیں ہے تاہم ون ویلنگ، پریشر ہارن اور ہوائی فائرنگ کی مکمل ممانعت ہے۔

انہوں نے شہریوں سے درخواست کی کہ وہ ساحل کے اطراف ٹریفک کی روانی کو ممکن بنانے کے لیے انتظامیہ سے بھرپور تعاون کریں۔

ڈبل سواری پر پابندی کا نوٹی فکیشن جاری کرنے پر وزیر اعلیٰ سندھ مراد علی شاہ نے سیکریٹری داخلہ کی سرزنش کرتے ہوئے کہا کہ 'آپ نے میری اجازت کے بغیر کیسے نوٹی فیکشن جاری کیا۔'

وزیراعلیٰ سندھ نے سیکریٹری کو ہدایت کی کہ 'آپ نوٹی فیکشن ختم کرکے رپورٹ کریں۔'