بھارتی میڈیا کے مطابق رواں برس رنبیر کپور، عالیہ بھٹ، ورون دھون، سشمیتاسین اور ارجن کپور کی شادیاں ہونے کا امکان ہے۔

اگرچہ فی الحال دیگر بولی وڈ اداکاروں کی شادی کی کوئی تصدیق نہیں ہوسکی، تاہم بولی وڈ اداکار پرتیک ببر نے رواں برس کی پہلی شادی کرلی۔

این ڈی ٹی وی کے مطابق آنجھانی اداکارہ سمیتا پاٹیل اور اداکار راج ببر کے بیٹے پرتیک ببر نے اپنی پرانی دوست ثانیہ ساگر سے ریاست اتر پردیش کے شہر لکھنؤ میں شادی کرلی۔

پرتیک ببر اور ثانیہ ساگر کی شادی کی تقریبات کا آغاز 22 جنوری کو ہوا تھا اور دونوں کی شادی کی تقریبات گزشتہ شب تک جاری رہیں۔

دونوں نے مہارا شٹر کی ہندو رسومات کے تحت شادی کی، جس میں دونوں کے اہل خانہ سمیت شوبز اور سیاست کی اہم شخصیات نے شرکت کی۔

پرتیک ببر اور ثانیہ ساگر نے 2018 میں ایک دہائی تک تعلقات میں رہنے کے بعد منگنی کرلی تھی، تاہم دونوں نے شادی کا اعلان نہیں کیا تھا۔

پرتیک ببر بولی وڈ کے وہ پہلے شخص بن گئے جنہوں نے 2019 میں پہلی شادی کی، خیال کیا جا رہا ہے کہ ان کے بعد دیگر شخصیات بھی شادی کے بندھن میں بندھ جائیں گے۔

پرتیک ببر نے 2008 سے ’جانے تو یا جانے نا‘ سے کیریئر کا آغاز کیا، انہوں نے ’دھوبی گھاٹ، ایک دیوانہ تھا اور آکرشن‘ جیسی فلموں میں بھی جوہر دکھائے۔

جلد ہی پرتیک ببر کی رنبیر کپور اور عالیہ بھٹ کے ساتھ فلم ’براہمسٹرا‘ بھی ریلیز ہوگی، علاوہ ازیں وہ چھچھورے میں بھی نظر آئیں گے۔

پرتیک ببر آنجھانی اداکارہ سمیتا پاٹیل کے بیٹے ہیں، اداکارہ انہیں جنم دینے کے کچھ دن بعد ہی چل بسی تھیں۔

پرتیک ببر کے والد اداکار راج ببر نے سمیتا پاٹیل کے انتقال کے بعد اداکارہ نادرہ ببر سے دوسری شادی کی، جس سے انہیں 2 بچے ہیں۔

اداکار آریان ببر اور اداکارہ جوہی ببر بھی راج ببر کے بچے ہیں اور دونوں پرتیک ببر کے سوتیلے بہن بھائی ہیں۔