رپورٹس ہیں کہ گووندا کا 34 سالہ بھتیجا اپنی فلیٹ پر مردہ پایا گیا۔

ٹائمز آف انڈیا نے اپنی رپورٹ میں بتایا کہ گووندا کا 34 سالہ بھتیجا اور فلم ہدایت کار جنویندرا آہوجا دل کے دورے سے چل بسے۔

رپورٹ کے مطابق جنویندرا آہوجا کے پوسٹ مارٹم سے پتہ چلا کہ انہیں دل کا دورہ پڑا تھا۔

جنویندرا آہوجا کی لاش ان کی ممبئی کے پوش علاقے میں موجود رہائش گاہ سے ملی تھی، جس کے بعد انہیں پوسٹ مارٹم کے لیے ہسپتال منتقل کردیا گیا تھا۔

جنویندرا آہوجا اداکار گووندا کے بھائی فلم ساز کرتی کمار کے بیٹے تھے۔

جنویندرا آہوجا نے 2007 میں ایک کامیڈین فلم ’جہاں جائیے گا، ہمیں پائیے گا‘ کی ہدایات بھی دی تھیں، اس فلم میں گووندا، قادر خان اورساکشی شیوانند سمیت دیگر اداکاروں نے کام کیا تھا۔

جنویندرا آہوجا سے متعلق اطلاعات ہیں کہ وہ ان کے بھائی کے سگے بیٹے نہیں تھے، بلکہ انہوں نے انہیں گود لیا تھا۔

جنویندرا آہوجا کی موت کی خبر کے بعد گووندا اور ان کے اہل خانہ میں غم کی لہر چھا گئی۔

جنویندرا آہوجا پر کچھ سال قبل ایک خاتون کے ساتھ چھیڑ چھاڑ کرنے اور متاثرہ خاتون کے شوہر کو تشدد کا نشانہ بنانے کا الزام بھی لگایا گیا تھا۔