اکشے کمار اپنی فلموں میں سلمان خان، سیف علی خان اور اجے دیوگن تمام نامور اداکاروں کے ساتھ کام کرچکے ہیں، تاہم شاہ رخ خان کے ساتھ انہوں نے کوئی فلم نہیں کی، اس ہی طرح شاہ رخ خان نے بھی کسی فلم میں اکشے کمار کے ساتھ کام نہیں کیا۔

اس حوالے سے جب ایک انٹرویو کے دوران شاہ رخ خان سے سوال کیا گیا تو اداکار کا کہنا تھا کہ ’کچھ ایسی شرائط ہیں جن کے پورے ہونے کے بعد ہی میں اکشے کمار کے ساتھ کام کرسکتا ہوں‘۔

شاہ رخ خان کا مزید کہنا تھا کہ ’میں اکشے کمار کی طرح صبح جلدی سو کر نہیں اٹھتا، میں تو اس وقت سونے جاتا ہوں جس وقت اکشے کمار اٹھتے ہیں، ان کے دن کی شروعات جلدی ہوتی ہے، جب میں کام شروع کرتا ہوں، اکشے ختم کرکے گھر جارہا ہوتا ہے‘۔

اداکار کے مطابق ’ہر کوئی میری طرح رات کو شوٹنگ کرنا پسند نہیں کرتا، مجھے ایسے ہی کام کرنا پسند ہے، میں اسے بدل نہیں سکتا‘۔

یہ بھی پڑھیں: شاہ رخ اور اکشے پھر آمنے سامنے

جب شاہ رخ سے پوچھا گیا کہ اگر کبھی وہ اکشے کمار کے ساتھ کسی فلم پر کام کریں تو وہ کیا کریں گے، اس پر اداکار نے بتایا کہ ’اکشے کے ساتھ کام کرنے میں مزاح آئے گا، دونوں سیٹ پر ملیں گے ہی نہیں، وہ جارہا ہوگا اور میں آرہا ہوں گا، میں اکشے کے ساتھ کام ضرور کرنا چاہتا ہوں لیکن ہمارے وقت نہیں مل پائیں گے‘۔

یاد رہے کہ شاہ رخ خان اکشے کمار کی مزاحیہ فلم ’ہے بےبی‘ میں ایک گانا میں جلوہ گر ہوئے تھے۔

جبکہ اکشے کمار نے بھی شاہ رخ خان کی کامیاب فلم ’اوم شانتی اوم‘ میں مختصر کردار نبھایا تھا۔

امید ہے ان دونوں اداکاروں کے مداح انہیں کسی فلم میں جلد ایک ساتھ دیکھیں۔