ڈان اخبار کی رپورٹ کے مطابق سینیٹ کی قائمہ کمیٹی برائے ایوی ایشن کے چیئرمین سینیٹر مشاہد اللہ خان نے کہا کہ ’اسٹاف کو ان کی سروس سے برطرف کرنا ایک سخت کارروائی ہے، سپریم کورٹ نے جعلی ڈگری کے حامل افراد کی برطرفی کا حکم نہیں دیا بلکہ عدالت نے ہدایت کی تھی کہ قانون کے مطابق طریقہ کار پر عمل کریں‘۔

اس کمیٹی کا اجلاس پی آئی اے ملازمین کی جعلی ڈگری کے معاملہ اور عملے کو خاص طور پر نچلے اسٹاف کو اعلیٰ افسران کی جانب سے مبینہ طور پر ہراساں کرنے کے معاملے پر بریفنگ کے لیے منعقد ہوا تھا۔

مزید پڑھیں: پی آئی اے کے 46 ملازمین کی ڈگریاں جعلی ہونے کا انکشاف

سینیٹر مشاہد اللہ خان نے پی آئی اے انتظامیہ پر زور دیا کہ جعلی ڈگریوں کے حامل افراد کو برطرف کرنے سے قبل ان حکام کے خلاف بلاتفریق کارروائی کریں جنہوں نے ایسے افراد کی دستاویزات کی تصدیق کیے بغیر انہیں ملازمت دی۔

انہوں نے کہا کہ جعلی ڈگری کے حامل اسٹاف کو عہدوں سے برطرف کرنے کے بجائے ان کے خلاف تنزلی یا مراعات روکنے جیسی دیگر تادیبی کارروائی کرنی چاہیے۔

دوران اجلاس چیئرمین نے کمیٹی کے سیکریٹری کو ہدایت کی کہ وہ سروسز سے ہٹائے گئے ملازمین اور پی آئی اے یونین کے اراکین کو بلائیں اور اس معاملے پر ان کا نقطہ نظر معلوم کریں۔

تاہم ان کے جواب میں پی آئی اے کے سی ای او ایئر مارشل ارشد ملک، جنہوں نے گزشتہ سال اکتوبر میں ہی عہدہ سنبھالا ہے، نے انتظامیہ کی جانب سے لیے گئے سخت اقدام کی کمیٹی کو وضاحت کی۔

ایئر مارشل ارشد ملک نے کمیٹی کو بتایا کہ ’جعلی ڈگری کے زیادہ کیسز سامنے آئے ہیں اور یہ معاملہ زیادہ تر پائلٹس کے ساتھ آیا ہے جو آج جہاز اڑا رہے ہیں، میں نے سپریم کورٹ کو اس معاملے پر بتایا تھا کہ یہ مسافروں کی زندگی اور موت کا معاملہ ہے، اگر ہم نے میرٹ پر سخت کارروائی نہیں کی تو اس طرح کی شمولیت کا کوئی اختتام نہیں ہوگا‘۔

انہوں نے کمیٹی کو آگاہ کیا کہ اسٹاف کا زیادہ تر ریکارڈ جان بوجھ کر خراب کیا گیا، پی آئی اے کی سابق انتظامیہ ضروری طریقہ کار پر عمل درآمد میں ناکام رہی۔

یہ بھی پڑھیں: پی آئی اے کو ماہانہ 2 ارب روپے کے آپریشنل خسارے کا سامنا

سی ای او کا کہنا تھا کہ کارکردگی کے اہم اشارے ظاہر ہی نہیں کیے گئے جبکہ تربیت کا کوئی تعین نہیں کیا گیا اور تربیتی مراکز بھی غیر فعال تھے۔

اجلاس کے دوران ایئر مارشل ارشد ملک نے قومی ایئر لائن کے ماضی کے بہترین دور کی بحالی کے لیے اور ادارے سے کرپشن کی بحالی کے لیے کی جانے والی کوششوں کے بارے میں بتایا۔

ساتھ ہی انہوں نے تاشقند، تہران، دہلی، بمبئی، نیویارک، کوپین ہیگن اور ایمسٹرڈم میں پی آئی اے کی پراپرٹریز کے دوبارہ قبضے کے حصول کے لیے اٹھائے گئے اقدامات اور فلائٹ میں انٹرٹینمنٹ کے موجودہ معاہدے کی بحالی کے بارے میں کی گئی کوششوں سے آگاہ کیا۔