کراچی کی تاریخی عمارت کراچی پورٹ ٹرسٹ (کے پی ٹی) میں پہلی بار عوامی تقریب کا اہتمام رواں ماہ 14 سے 16 مارچ کے دوران کیا گیا۔

کے پی ٹی کی گزشتہ ایک سو سالہ تاریخ میں وہاں پہلی بار ’انٹرنیشنل پبلک آرٹ فیسٹیول‘ (آئی پی اے ایف) کا انعقاد کیا گیا جس میں پاکستان سمیت دیگر ممالک کے 60 آرٹسٹوں کے منصوبوں کو پیش کیا گیا۔

انٹرنیشنل پبلک آرٹ فیسٹیول کی افتتاحی تقریب کراچی پورٹ ٹرسٹ کے عقب میں ’پرسکون چوک‘ پر منعقد کی گئی تھی جس میں شہریوں کی بڑی تعداد نے شرکت کی۔

افتتاحی تقریب کے بعد آرٹ فیسٹیول کو عوام کے لیے کھولا گیا، جس کا اہتمام کے پی ٹی کے گراؤنڈ میں کنٹینرز سجا کر کیا گیا تھا۔

آرٹ فیسٹیول میں پیش کیے گئے منصوبوں کو کے پی ٹی کی عمارت میں پیش کرنے کے بجائے انہیں کنٹینرز میں پیش کیا گیا۔

مجموعی طور پر آرٹ فیسٹیول میں 60 آرٹسٹوں کے مختلف منصوبے پیش کیے گئے تھے، جن میں عوام نے گہری دلچسپی دکھائی۔

آئی ایم کراچی کے زیر اہتمام منعقد کیے گئے عالمی آرٹ فیسٹیول کو دیکھنے کے لیے نوجوان بڑی تعداد میں آئے، تاہم بزرگ شہریوں اور ادھیڑ عمر کے افراد نے بھی فیسٹیول میں دلچسپی دکھائی۔

ابتدائی طور پر آرٹ فیسٹیول کا اعلان رواں ماہ مارچ کے آغاز میں کیا گیا تھا، تاہم ناسازگار سیاسی ماحول کی وجہ سے اسے مؤخر کرکے اسے مارچ کے وسط میں منعقد کیا گیا۔

اگرچہ آرٹ فیسٹیول کا انعقاد پاکستان سپر لیگ (پی ایس ایل) کے فائنل سے تین دن قبل کیا گیا تھا، تاہم پھر بھی شہریوں کی بڑی تعداد نے اس میں شرکت کی۔

فیسٹیول منعقد کرنے والے منتظمین کا کہنا تھا کہ انہیں اتنی بڑی تعداد میں افراد کے شامل ہونے کی توقع نہیں تھی، عوام نے ان کی توقعات سے زیادہ فیسٹیول کو کامیاب بنایا۔

آرٹ فیسٹیول کے کراچی پورٹ ٹرسٹ کی عمارت میں انعقاد پر کے پی ٹی انتظامیہ نے بھی خوشی کا اظہار کیا اور اس بات پر فخر کا اظہار کیا کہ آرٹ فیسٹیول کی وجہ سے ان کی تاریخی عمارت عوام کا توجہ ٓحاصل کرنے میں کامیاب رہی۔

آرٹ فیسٹیول کی خاص بات یہ تھی کہ اس میں پہلی بار عوام کو کنٹینرز کا مثبت اور آرٹ میں استعمال دیکھنے کو ملا، ورنہ کراچی اور ملک کا عوام کنٹینرز کو روڈوں کو بند کرنے اور مظاہروں میں استعمال ہوتے دیکھتا آیا ہے۔

عالمی آرٹ فیسٹیول انتظامیہ کے مطابق آئندہ برس جنوری کے اختتام یا فروری کے آغاز میں دوسرے فیسٹیول کا انعقاد کیا جائے گا۔