مارٹن کوبلر کو ان کے عوامی انداز اور پاکستان کے مثبت پہلو اجاگر کرنے کے باعث عوام بے حد پسند کرتے ہیں۔

پاکستان سے واپسی سے پہلے انہوں نے اپنا الوداعی پیغام بھی ریکارڈ کروایا جس میں خصوصی طور پر تیار کردہ شیروانی پہنے نظر آئے۔

پیغام میں انہوں نے بتایا کہ وہ بہت اداس دل کےساتھ اپنے وطن لوٹ رہے ہیں اس کے ساتھ انہوں پاکستان کے لیے نیک تمناؤں کا اظہار بھی کیا

اس کے علاوہ انہوں نے بتایا کہ وہ بطور سیاح مستقبل میں پاکستان آئیں گے۔

ان کی پاکستان سے محبت کا اندازہ اس سے لگایا جاسکتا ہے انہوں نے ٹوئٹر پر اپنا نام نہ صرف انگریزی بلکہ اردو میں بھی لکھ رکھا ہے اور اپنی ٹوئٹ کو دلچسپ اردو ترجمے کے ساتھ بھی ضرور ٹوئٹ کرتے ہیں۔

زندگی کے کسی بھی شعبے میں پاکستان کو ملنے والا کوئی اعزاز ہو یا کسی بھی پاکستانی کا کوئی کارنامہ مارٹن کوبلر نے کبھی پاکستان کو سراہنے میں کنجوسی نہیں دکھائی۔

اس کے علاوہ وہ بغیر کسی پروٹوکول کے سیاحتی مقامات کے ساتھ ساتھ گلی کوچوں کی سیر کرتے بھی نظر آئے، پی آٹی آئی صوبائی حکومت کی کچھ خامیوں کی نشاندہی پر انہیں تنقید کا سامنا بھی رہا۔

وہ پاکستانی ثقافت کے بھی بڑے دلدادہ ہیں خاص کر روایتی فنون سے دلچسپی کا اندازہ اس سے لگایا جاسکتا ہے کہ وہ جرمنی میں اپنے استعمال کے لیے پاکستانی ٹرک آرٹ سے مزین اسکوٹر اور خوبصورت نقش و نگار سے سجا ہوا خوبصورت تاریخی دروازہ بھی اپنے ہمراہ جرمنی لے کر جارہے ہیں۔

وی آئی پی اور سب سے بڑھ کر غیر ملکی سفیر ہونے کے باوجود وہ جس طرح پاکستان کے گلی کوچوں میں گھومتے اور عوامی مقامات پر کھانا کھاتے نظر آئے اس طرزِ عمل نے سب کا جیت لیا۔

جرمن سفیر نے اپنی ٹوئٹس میں جہاں پاکستان کی ہر مثبت بات کو اجاگر کیا وہیں ماحول، سماجی ناہمواریوں، مسائل، یکساں حقوق کے حوالے سے بھی سب کو آگاہی فراہم کرتے نظر آئے۔

انتہائی عاجزانہ شخصیت کے مالک مارٹن جاتے جاتے بھی اپنے ملازمین کی تواضع کرتے اور انہیں کے ساتھ بیٹھ کر کھانا کھاتے نظر آئے۔

خیال رہے کہ مارٹن کوبلر نے 10 اگست 2017 کو اس وقت کے صدر ممنون حسین کو اپنی دستاویزات پیش کرکے باقاعدہ اپنے عہدے کا چارج لیا تھا۔

عہدہ سنبھالنے کے صرف ایک ماہ بعد وہ واہگہ بارڈر پر پریڈ دیکھنے کے لیے پاکستان رینجرز کے ساتھ نظر آئے اور اس کے بعد سے ہی اپنی متحرک شخصیت کے سبب مقبول ہوگئے تھے۔

اپنی واپسی پر جہاں وہ خود اداس ہیں وہیں ان کے پاکستانی مداح بھی افسردہ نظر آئے اور ان کا نام پاکستان میں ٹوئٹر پر ٹرینڈ کرتا رہا۔

وہ 1983 سے جرمن وزارت خارجہ سے وابستہ ہیں، جبکہ ان کو 2003 میں پہلی بار سفیر تعینات کیا گیا تھا، ان کی پہلی تعینات مصر میں ہوئی تھی، جہاں وہ 2006 تک تعینات رہے۔

یہ بھی پڑھیں: پاکستانی رینجرز کی ممنون یہ یورپی شخصیت کون؟

بعد ازاں 07-2006 میں ان کو عراق میں جرمنی کا سفیر مقرر کیا گیا، یہ وہ زمانہ تھا جب جنگ سے متاثرہ ملک عراق کے حالات شدید مخدوش تھے اور دسمبر 2006 میں عید کے دن صدام حسین کو پھانسی دی گئی، تاہم مارٹن کوبلر کو 2007 میں وزارت خارجہ میں ڈائریکٹر کلچر اینڈ کمیونیکیشن مقرر کر دیا گیا، جہاں وہ 3 سال یعنی 2010 تک تعینات رہے۔

2010 میں ان کو اقوام متحدہ کے افغانستان کے لیے معاونتی مشن (یوناما) کے لیے خصوصی نمائندے کا نائب مقرر کیا گیا، جہاں وہ 2011 تک تعینات رہے۔

اس کے بعد وہ اقوام متحدہ کے عراق کے لیے خصوصی مشن (یونامی) کے لیے خصوصی نمائندے مقرر ہوئے، جہاں 2013 تک انہوں نے خدمات انجام دیں۔

مزید پڑھین: گلگت بلتستان سیاحت کیلئے بہترین مقام ہے، جرمن سفیر

2013 سے 2015 تک وہ جنگ زدہ ملک کانگو کے لیے اقوام متحدہ کے اسٹیبلائزیشن مشن (مونوسکو) کے خصوصی نمائندے مقرر رہے، 2015 کے بعد سے مارٹن کوبلزشورش زدہ ملک لیبیا کے لیے اقوام متحدہ کے سپورٹ مشن (یو این ایس ایم آئی ایل) کے خصوصی نمائندے مقرر تھے۔