گزشتہ دنوں استنبول میں دنیا کے مصروف ترین ائیرپورٹس میں سے ایک اتاترک ائیرپورٹ پر آپریشنز کو باضابطہ طور پر بند کردیا گیا جبکہ تمام کمرشل پروازیں نئے ہوائی اڈے پر منتقل کردی گئیں۔

یعنی اب استنبول کا نیا ائیرپورٹ باقاعدہ طور پر آپریشنل ہوگیا ہے، جہاں پہلی پرواز نے اکتوبر 2018 میں اڑان بھری تھی مگر اس کی تعمیر کا پہلا مرحلہ اب جاکر مکمل ہوا ہے، جس میں تین رن ویز اور ڈیڑھ کروڑ اسکوائر فٹ ٹرمینل رقبہ شامل ہے۔

ابھی اس کے 4 تعمیراتی مراحل باقی ہیں جو 2025 تک مکمل ہوں گے اور اس کے بعد یہ دنیا کا سب سے بڑا ائیرپورٹ بن جائے گا جو کہ مجموعی طور پر 7 کروڑ 60 لاکھ اسکوائر فٹ پر پھیلا ہوگا جبکہ اس کی تعمیراتی لاگت 12 ارب ڈالرز ہوگی۔

پہلے مرحلے کی تکمیل کے بعد ہی اب یہاں سالانہ 9 کروڑوں مسافروں کو ہینڈل کرنا ممکن ہوگیا ہے اور جب یہ مکمل ہوجائے تو تو یہ ہر سال 20 کروڑ مسافروں کو خوش آمدید کہے گا۔

اس طرح یہ مسافروں کے ٹریفک کے لحاظ سے دنیا کا سب سے بڑا ائیرپورٹ کہلائے گا۔

اس کی ڈیوٹی فری شاپس کے لیے ہی 55 ہزار اسکوائر میٹر رقبہ موجود ہے اور یہ ترکی کے مشہور آبنائے باسفورس سے متاثر ہے جس کو 7 حصوں میں مختلف طرح کے کانسیپٹ جیسے فیشن گارڈن، فیمیلی پیلس اور اسٹائل بیج وغیرہ موجود ہوں گے۔

اس ائیرپورٹ میں ایک یوٹیل (ہوٹل) بھی ہے جس میں 451 کمرے مسافروں کے لیے موجود ہیں۔

اس کا ائیر ٹریفک کنٹرول ٹاور بھی منفرد ہوگا جو کہ ایک ٹیولپ پھول کی شکل کا ہوگا جو کہ ترک ثقافت کا مقبول اور علامتی پھول ہے۔

ترک ائیرلائن نے 5 اپریل کو اتاترک ائیرپورٹ سے اپنے آپریشنز اس نئے ائیرپورٹ میں منتقل کرنے کا کام شروع کیا اور محض 24 گھنٹے میں اسے مکمل کرلیا۔