’مین ان بلیک: انٹرنیشنل’ سیریز کی چوتھی فلم ہے، جسے رواں برس جون میں ریلیز کیا جائے گا۔

’مین ان بلیک‘ سیریز کی چوتھی فلم میں کرس ہیمس ورتھ، ٹیسا تھومپسن، کمیل نانجیانی، ربیکا فرگوسن، ایما تھومپسن اور اسٹیفن سیمسن سمیت دیگر اداکار ایکشن میں دکھائی دیں گے۔

جاری کیے گئے ٹریلر سے فلم کی کہانی کو سمجھنا مشکل ہے، تاہم ٹریلر میں سحر انگیز مناظر دیکھ کر اندازا ہوتا ہے کہ فلم شائقین کی توجہ حاصل کرنے میں کامیاب جائے گی۔

ٹریلر سے اندازا ہوتا ہے کہ نہ صرف فلم میں بھرپور ایکشن دیکھنے کو ملے گا بلکہ اس میں شامل کامیڈی بھی شائقین کو خوب محظوظ کرے گی۔

فلم کی کہانی دراصل ہائی ٹیکنالوجی ہتھیاروں سے لیس کمپنی کے ایجنٹس اور زمین پر آنے والی ایک طاقتور قوت کے انجانی کے گروپس کے درمیان جاری جنگ کے گرد گھومتی ہے، تاہم فلم میں ایک ساتھ دیگر کہانیاں بھی دیکھنے کو ملیں گی۔

فلم میں کرس ہیمس ورتھ اور ٹیسا تھومپسن ہائی ٹیکنالوجی سے لیس ہتھیاروں والی ایجنسی سے منسلک ہونے کے بعد طاقتور قوت کے حامل انجانی مخلوق کے گروپ سے لڑتے دکھائی دیں گے۔

فلم کا پہلا ٹریلر گزشتہ برس دسمبر میں ریلیز کیا گیا تھا اور اب اس کا دوسرا ٹریلر ریلیز کرنے کے ساتھ ہی فلم کو نمائش کے لیے پیش کرنے کی تاریخ کا اعلان بھی کردیا گیا۔

پروڈیوسر والٹر ایف پارکس اور لاری مکنولڈ کی اس فلم کی ہدایات ایف گیری گرے نے دی ہیں جب کہ اس کی کہانی آرٹ مارکم اور میٹ ہالووے نے لکھی ہے۔

اس سیریز کی تیسری فلم ’مین ان بلیک تھری‘ 2012 میں ریلیز کی گئی جب کہ دوسری فلم 2002 اور پہلی فلم 1997 میں ریلیز کی گئی تھی۔

خیال کیا جا رہا ہے کہ پہلی تینوں فلموں کی طرح چوتھی فلم بھی اچھی کمائی کرنے میں کامیاب جائے گی۔