خیال رہے کہ وقار ذکا نے زمانہ طالب علمی میں تیار کیے گئے گانے ’نہیں پڑھنا میں نے پورا سال‘ سے شہرت حاصل کی، جس کے بعد انہوں نے بطور ریڈیو جوکی (آر جے) کیریئر کا آغاز کیا۔

آر جے کیریئر میں کامیابی کے بعد انہوں نے بطور ٹی وی میزبان کام شروع کیا اور انہوں نے ’اے آر وائی میوزک‘ پر ریالٹی شو ’لونگ آن دی ایج‘ شروع کیا جس میں نوجوان لڑکوں اور لڑکیوں سے خطرناک کرتب کروائے جاتے تھے۔

وقار ذکا ٹی وی و سوشل میڈیا پر جاری کیے گئے مواد کی وجہ سے تنقید کا نشانہ بھی بنتے رہے ہیں، ان پر نوجوان نسل کو بگاڑنے جیسے الزامات بھی لگے۔

وقار ذکا نے 2013 کے عام انتخابات میں بھی حصہ لیا، تاہم انہیں کامیابی نہیں مل سکی۔

لیکن اب انہوں نے اپنی ماضی کی زندگی اور کام پر ندامت کرتے ہوئے مداحوں سے معافی مانگی ہے اور مستقبل میں اچھے کام کرنے کے عزم کا اعادہ کیا ہے۔

اپنی فیس بک پوسٹ کے ذریعے وقار ذکا نے اعتراف کیا کہ وہ ماضی میں غلط اور نوجوان نسل کو بھٹکانے والا مواد تیار کرتے رہے ہیں۔

ساتھ ہی انہوں نے اپنی پوسٹ میں اس بات کا اعادہ بھی کیا کہ وہ مستقبل میں ایسا مواد تیار کرنے کی کوشش کریں گے جس کے ذریعے لوگ اچھائی کے راستے پر آجائیں اور انہیں سیکھنے کو بھی بہت کچھ ملے۔

انہوں نے اپنے ریالٹی ٹی وی شو کا حوالہ دیتے ہوئے اس میں شریک ہونے والے تمام نوجوانوں سے بھی معافی مانگی اور اعتراف کیا کہ اب انہیں اس پروگرام کے مواد پر شرمندگی ہے۔

وقار ذکا نے مزید لکھا کہ وہ مستقبل میں حکومت پر تعلیم اور خصوصی طور پر سائنس جیسے مضمون کو عام کرنے کے لیے دباؤ ڈالنے کی کوشش کریں گے اور وہ خود بھی تعلیمی اور سائنسی حوالے سے کردار ادا کریں گے تاکہ وہ حقیقی معنوں میں لوگوں کی مدد کرسکیں۔