افتتاحی تقریب کو 'اوپننگ پارٹی' کا نام دیا گیا تھا جس کے باقاعدہ آغاز سے قبل ویسٹ انڈیز کے عظیم بلے باز سر ویوین رچرڈز نے کہا کہ ویسٹ انڈیز کو ہرانا آسان نہیں ہے۔

انہوں نے ورلڈ کپ کی مضبوط امیدوار ٹیموں کا نام لیتے ہوئے کہا کہ بھارت اور پاکستان کے علاوہ میزبان انگلینڈ بھی بڑی ٹیم ہے جو ٹورنامنٹ جیتنے کی اہلیت رکھتی ہے۔

پاکستان کی جانب سے اظہر علی اور ملالہ یوسف زئی نے 60 سیکنڈز میں 38 رنز بنائے جبکہ ویسٹ انڈیز نے سر ویوین رچرڈز کی قیادت میں 47 رنز بنائے، بھارت کی جانب سے انیل کمبلے اور بولی ووڈ اسٹار فرحان اختر نے نمائندگی کی اور 19 رنز بنائے۔

سری لنکا کی جانب سے مہیلا جے وردھنے اور بنگلہ دیش کی نمائندگی عبدالرزاق کے ہمراہ خاتون اداکارہ نے کی، آسٹریلیا نے بریٹ لی کی قیادت میں 69 رنز بنائے، جیمز فرینکلن نے نیوزی لینڈ کے لیے 32 رنز بنائے، کیلس نے جنوبی افریقہ کے لیے 48 رنز بنائے اور انگلینڈ نے کیون پیٹرسن کی قیادت میں 74 رنز بنائے۔

یہ بھی پڑھیں: چاچا کرکٹ ورلڈ کپ میں شرکت کیلئے لندن روانہ

انگلینڈ نے 60 سیکنڈز چیلنج میچ میں آسٹریلیا کو پیچھے چھوڑتے ہوئے کامیابی حاصل کی۔

قبل ازیں ورلڈ کپ میں حصہ لینے والی تمام ٹیموں کے کپتانوں نے ملکہ برطانیہ ایلزبتھ سے ملاقات کی اور تصاویر بھی کھنچوائیں جہاں پاکستان کے کپتان سرفراز احمد اپنے قومی لباس میں بکنگھم پیلس میں اس تقریب میں شریک ہوئے۔

ورلڈ کپ کی افتتاحی تقریب کے دوران دفاعی چمپیئن آسٹریلیا کے سابق کپتان مائیکل کلارک ورلڈ کپ کی ٹرافی اٹھائے اسٹیج پر پہنچے اور ٹرافی کو سجا دیا جس کے بعد ورلڈ کپ کا آفیشل گانا بھی گایا گیا۔

واضح رہے کہ ورلڈ کپ کا آغاز 30 مئی کو میزبان انگلینڈ اور جنوبی افریقہ کے درمیان میچ سے ہوگا جو اوول میں کھیلا جائے گا جس کے بعد 31 مئی کو پاکستان اور ویسٹ انڈیز کی ٹیمیں آمنے سامنے ہوں گی۔

رواں ورلڈ کپ میں دنیا کی سرفہرست 10 ٹیمیں حصہ لے رہی ہیں جو گروپ مرحلے میں ایک دوسرے کے مدمقابل آئیں گی۔