لاہور میں پاکستان کرکٹ بورڈ کے زیر اہتمام نیشنل کرکٹ اکیڈمی میں قومی ٹیم کا پری سیزن کنڈیشننگ کیمپ جاری ہے جس کی سربراہی سابق کپتان مصباح الحق کر رہے ہیں۔

مزید پڑھیں: ہیسن کا قومی ٹیم کی کوچنگ سے انکار، مصباح مضبوط ترین امیدوار

حسن علی کی شادی میں شرکت کے سبب شاداب ابتدائی دنوں میں کیمپ میں شرکت نہیں کر سکے تھے اور بورڈ نے انہیں تین دن کی چھٹی دی تھی لیکن اب انہوں نے کیمپ جوائن کر لیا ہے۔

جمعے کو میڈیا سے گفتگو کرتے ہوئے شاداب خان نے بھی مصباح الحق کو کوچ بنانے کے حق میں ووٹ دیتے ہوئے کہا کہ سابق کپتان سے بہت کچھ سیکھا ہے اور اگر وہ قومی ٹیم کے ہیڈ کوچ بن گئے تو تمام کھلاڑیوں کو بہت کچھ سیکھنے کو ملے گا۔

انہوں نے کہاکہ میں نے وائٹ بال کرکٹ میں کافی اچھی کارکردگی دکھائی ہے اور اب ریڈ بال کرکٹ میں بھی اچھی کارکردگی دکھانے کی کوشش کروں گا، کوشش ہوتی ہے کہ ہر میچ میں بہترین کارکردگی دکھائوں البتہ نتائج میرے ہاتھ میں نہیں۔

یہ بھی پڑھیں: مصباح سخت نہیں لیکن ڈسپلن پر سمجھوتہ نہیں کرتے، اسد شفیق

نوجوان لیگ اسپنر نے کہا کہ فٹنس کیمپ سے ہمیشہ کھلاڑیوں کو فائدہ ہوتا ہے، تین ہفتے پہلے ہیپاٹائٹس ٹیسٹ ہوا جو کہ کلیئر رہا۔

عماد وسیم اور حسن علی کی شادی کے سوال پر شاداب خان کا کہنا تھا کہ جوڑے آسمانوں پر بنتے ہیں، میرے لیے جو ہوگا دیکھیں گے۔