کرکٹ ویب سائٹ کرک انفو کی رپورٹ کے مطابق وارین ڈیوٹرن نے سری لنکا کے خلاف ٹی ٹوئنٹی سیریز کے دوران لاہور کا دورہ کیا اور سیریز کے کامیاب اختتام پر بہت متاثر ہوئے ہیں۔

وارین ڈیوٹرن نے پاکستان کرکٹ بورڈ (پی سی بی) کو ایک انٹرویو میں کہا کہ ‘ہمارے ساتھ انتہائی بہترین انداز کی مہمان نوازی، خلوص اور پیار سے پیش آئے اور کرکٹ دیکھنا سب کا مقصد تھا’۔

ان کا کہنا تھا کہ ‘کرکٹ آئرلینڈ اب ایک ٹیسٹ نیشن ہے اور ہم اس کو بہت ضروری سمجھتے ہیں کہ ہم کرکٹ کی دنیا میں ابھرتے اور مضبوط رکن کی حیثیت سے کردار ادا کریں’۔

مزید پڑھیں:امام کی شاندار بیٹنگ، پاکستان نے آئرلینڈ کو 5وکٹوں سے شکست دے دی

کرکٹ آئرلینڈ کے سربراہ کا کہنا تھا کہ ‘ہم پاکستان میں بین الاقوامی کرکٹ کی واپسی میں تعاون کے لیے اپنا کردار ادا کرنا چاہتے ہیں’۔

ان کا کہنا تھا کہ ‘یہ انسانی گمان ہوتا ہے کہ جب تک چیزوں کو آپ خود نہیں دیکھتے اس وقت تک تصورات ہی ہوتے ہیں اور اس دورے سے میں سمجھتا ہوں کہ اس تصور میں تبدیلی شروع ہوگی’۔

دورے کے حوالے سے ان کا کہنا تھا کہ یہ دورہ پاکستان کرکٹ بورڈ کی دعوت پر کیا گیا تھا۔

سری لنکا کی ٹیم کو کراچی اور لاہور میں شان دار سیکیورٹی کے انتظامات کیے گئے تھے اسی لیے آئرلینڈ کرکٹ کے سربراہ بھی سیکیورٹی انتظامات سے مطمئن نظر آئے۔

یہ بھی پڑھیں:ہمارا دورہ پاکستان پوری دنیائے کرکٹ کیلئے پیغام ہے، سری لنکن کوچ

وارین ڈیوٹرن نے کہا کہ ‘اسلام آباد اور لاہور میں ہم نے جو دیکھا وہ غیر معمولی تھا جہاں کرکٹ حکام، سیکیورٹی حکام، حکومت، پولیس اور دیگر تمام افراد کو تشخص کی بحالی کے لیے مل کر شان دار کام کررہے تھے’۔

انہوں نے کہا کہ ‘اس سے بہتری کا اشارہ ملتا ہے اور اگر ہمیں ساری سہولیات دستیاب ہیں تو پھر یہاں نہ آنے کی کوئی وجہ نظر نہیں آتی’۔

کرکٹ آئرلینڈ کے چیف ایگزیکٹیو نے کہا کہ ‘رواں ماہ کے آخر میں ہمارے بورڈ کا اجلاس ہے اور بورڈ کو آگاہ کروں گا کہ ہم نے غیرمعمولی اقدامات دیکھے ہیں جو دنیا بھر میں کرکٹ بورڈ کی سطح پر دیکھتے ہیں اور ہمیشہ کی طرح ہمیں اپنا کردار ادا کرنا ہوگا’۔

ان کا کہنا تھا کہ ‘ہم دیگر بورڈز کو بھی کہیں گے کہ ہم ماضی میں یہاں گئے’۔

مزیدپڑھیں:پاک-آئرلینڈ تاریخی ٹیسٹ کی جھلکیاں

پاکستان اور آئرلینڈ کے درمیان مئی 2018 میں ٹیسٹ سیریز بھی کھیلی جاچکی ہے جس میں آئرلینڈ نے اپنی تاریخ کا پہلا ٹیسٹ میچ کھیلا تھا۔

خیال رہے کہ سری لنکا کی کرکٹ ٹیم ستمبر کے آخر میں پاکستان آئی تھیں اور 27 ستمبر سے ایک روزہ سیریز کا آغاز ہوا تھا اور 7 اکتوبر کو لاہور میں آخری ٹی ٹوئنٹی کھیلا گیا تھا۔

سری لنکا اور پاکستان کے درمیان ایک روزہ سیریز کراچی میں کھیلی گئی تھی جہاں پاکستان نے 2-0 سے کامیابی حاصل کی تھی جبکہ لاہور میں سری لنکا نے ٹی ٹوئنٹی سیریز میں وائٹ واش کیا تھا۔