یہ خبریں تو پہلے ہی تھیں کہ عائشہ عمر جلد ہی پاکستان کے پسماندہ ترین صوبے بلوچستان کے حالات پر بننے والی ایک فلم میں ایکشن میں دکھائی دیں گی۔

تاہم اب اداکارہ نے اس بات کی تصدیق بھی کردی کہ وہ جلد ہی بلوچستان کے معاملے پر بننے والی فلم کی شوٹنگ میں مصروف ہوجائیں گی۔

ڈان امیجز سے بات کرتے ہوئے عائشہ عمر نے تصدیق کی کہ وہ پروڈیوسر عرفان اشرف کی آنے والی فلم ’ڈھائی چال‘ کا حصہ ہوں گی۔

اداکارہ نے فلم کے حوالے سے مزید بات کرتے ہوئے بتایا کہ وہ ’ڈھائی چال‘ میں ایک صحافی کا کردار ادا کرتی دکھائی دیں گی جو بلوچستان میں بیرونی قوتوں کی مداخلت کو بے نقاب کرتی دکھائی دیں گی۔

انہوں نے فلم کی کہانی اور اپنے کردار کے حوالے سے مزید بات کرنے سے گریز کرتے ہوئے کہا کہ شائقین کو فلم کی کہانی بہت اچھی لگے گی، فلم میں بلوچستان میں بیرونی قوتوں کی مداخلت کی وجہ سے وہاں پیدا ہونے والے کشیدہ اور شورش زدہ حالات کو دکھایا جائے گا۔

یہ بھی پڑھیں: اب تک میری کوئی بھی’اچھی فلم‘ریلیز نہیں ہوئی،عائشہ عمر کا اعتراف

انہوں نے فلم پروڈیوسر کی تعریف کرتے ہوئے کہا کہ عرفان اشرف چوں کہ بلوچستان میں رہے ہیں اور وہیں انہوں نے تعلیم حاصل کی، اس لیے وہ بلوچستان کے حالات سے باخبر ہیں اور انہیں وہاں کی نوجوان نسل میں پائی جانے والی مایوسی کا بھی ادراک ہے۔

عائشہ عمر کے مطابق فلم میں ان کے ساتھ جہاں شمعون عباسی ایکشن میں دکھائی دیں گے، وہیں فلم کی کاسٹ میں دیگر معروف اداکار اور یونیورسٹی کے نوجوان طلبہ بھی شامل ہیں۔

’ڈھائی چال‘ کے حوالے سے شمعون عباسی نے ڈان امیجز سے بات کرتے ہوئے بتایا کہ وہ فلم میں بھارت کی خفیہ ایجنسی ’را‘ کے کارندے کے طور پر دکھائی دیں گے۔

شمعون عباسی نے انکشاف کیا کہ وہ فلم میں بلوچستان سے گرفتار ہونے والے ’را‘ ایجنٹ کلبھوشن یادیو کا کردار ادا کریں گے۔

مزید پڑھیں: عائشہ عمر اور شمعون عباسی کی فلموں میں مقابلہ

انہوں نے بھی فلم کی مزید تفصیلات بتانے سے گریز کیا، تاہم کہا کہ فلم کی کہانی شائقین کو اچھی لگے گی اور پہلی بار شائقین کو ایک منفرد کہانی پر مبنی فلم دیکھنے کو ملے گی۔

فلم کی دیگر کاسٹ میں عدنان شاہ ٹپو، رشید ناز، سلیم معراج، ہمایوں اشرف، پاکیزہ خان اور دیگر اداکار شامل ہیں۔

ابھی یہ واضح نہیں کہ فلم کو کب تک ریلیز کیا جائے گا، تاہم جلد ہی فلم کی شوٹنگ شروع کردی جائے گی اور خیال کیا جا رہا ہے کہ آئندہ سال کے وسط تک فلم کو ریلیز کیا جائے گا۔