جنوبی سفید گینڈوں کو نایاب نسلوں میں شمار کیا جاتا ہے، خیال کیا جاتا ہے کہ دنیا بھر میں مذکورہ نسل کے گینڈوں کی تعداد محض 1800 کے قریب ہے۔

جنوبی سفید گینڈوں کے علاوہ ان کی ہی نسل سے تعلق رکھنے والے شمالی سفید گینڈے اب دنیا سے ختم ہونے والے ہیں۔

شمالی سفید گینڈوں کا دنیا میں ایک بھی نر گینڈا موجود نہیں ہے، اس نسل کی واحد 2 مادہ گینڈے زندہ ہیں اور ماہرین مادہ گینڈوں کو مصنوعی طریقے سے حاملہ کرنے کی کوششوں میں مصروف ہیں۔

یہ بھی پڑھیں: دنیا کے واحد نر سفید گینڈے کو مار دیا گیا

شمالی سفید گینڈے کے دنیا میں بچ جانے والے واحد نر گینڈے کو گزشتہ برس مارچ میں افریقی ملک کینیا کے ایک فارم میں متعدد بیماریوں اور زائد العمری کے باعث موت کی نیند سلادیا گیا تھا۔

شمالی سفید گینڈوں کے بچ جانے والے واحد نر گینڈے کو 45 سال کی عمر میں موت کا انجکشن دے کر مارا گیا تھا، کیوں کہ وہ عمر کے آخری حصے میں کھڑے ہونے کے قابل بھی نہیں رہا تھا۔

سائنسدانوں نے نر گینڈے کو موت کی نیند سلانے سے قبل ان کے اسپرم کو محفوظ کرلیا تھا، تاکہ ان کے اسپرم بچ جانے والی 2 مادہ گینڈوں میں داخل کرکے مصنوعی طریقے سے شمالی سفید گینڈوں کی افزائش کی جاسکے۔

شمالی سفید گینڈوں کی طرح جنوبی سفید گینڈوں کو بھی دنیا کے نایاب جانوروں میں شمار کیا جاتا ہے، تاہم جنوبی گینڈوں کے متعدد نر اور مادہ گینڈے متحرک ہیں اور ان کے ہاں بچوں کی پیدائش ہوتی رہی ہے۔

خبر رساں ادارے ’اے ایف پی‘ کے مطابق بیلجیم کے ’زو‘میں مدیبا نامی مادہ گینڈے نے گزشتہ ماہ 25 نومبر کو بچے کو جنم دیا تھا اور اب چڑیا گھر انتظامیہ نے دونوں ماں اور بچے کی ویڈیو اور تصاویر جاری کردی ہیں۔

چڑیا گھر انتظامیہ کی جانب سے جاری کی گئی ویڈیو میں مادہ گینڈے کو اپنے بچے کے ساتھ خوش دیکھا جا سکتاہے۔

حالیہ بچے کی پیدائش سے قبل بھی مذکورہ جنوبی سفید مادہ گینڈے نے 2016 میں ایک بچے کو جنم دیا تھا۔

بیلجیم چڑیا گھر انتظامیہ کے مطابق ان کے ہاں ایک اور مادہ گینڈا رواں ماہ کے آخر تک بچے کو جنم دے گی۔

سفید گینڈوں کی پیدائش سے ماہرین انتہائی خوش ہیں اور خیال کیا جا رہا ہے کہ آنے والے وقت میں اس نسل کے گینڈوں کی پیدائش میں مزید اضافہ ہوگا۔