ترجمان دفترخارجہ عائشہ فاروقی کی جانب سے جاری بیان میں واضح کیا گیا ہے کہ ‘میڈیا کے ایک حلقے میں بھارتی مقبوضہ جموں و کشمیر کے رہائشیوں کے لیے ویزا سے متعلق تبدیلیوں کی رپورٹس گردش کر رہی تھیں جو مکمل طور پر بے بنیاد اور غلط ہیں’۔

انہوں نے کہا کہ ‘پاکستانی ہائی کمیشن بھارتی مقبوضہ جموں وکشمیر کے رہائشیوں کو حکومت کی ویزا پالیسی اور پاکستان اور بھارت کے مابین دوطرفہ معاہدوں کے مطابق ویزا جاری کر رہا ہے’۔

ترجمان کا کہنا تھا کہ ‘بھارتی مقبوضہ جموں و کشمیر کے رہائشیوں کے لیے ویزا پالیسی میں کوئی تبدیلی نہیں کی گئی’۔

میڈیا رپورٹس کو مسترد کرتے ہوئے ان کا کہنا تھا کہ ‘نئی دہلی میں پاکستانی ہائی کمیشن بھی 5 اگست کے بعد انسانی حقوق کی صورت حال کا ادراک کرتے ہوئے خطے کے رہائیشیوں کی ویزے کی درخواستوں پر اقدامات کررہا ہے’۔

عائشہ فاروقی نے کہا کہ ‘مقبوضہ جموں کشمیر کے ویزا درخواست دہندگان کو سہولت فراہم کرنے کے لیے پاکستانی ہائی کمیشن تمام کوششیں کررہا ہے، مکمل دستاویزات اور ضروریات کو پورا کرنے والوں کو جلد سے جلد ویزا جاری کیا جاتا ہے’۔