2019 کے اختتام پر 2020 کے لیے معروف اداکاروں نے سماجی رابطوں کی ویب سائٹس پر لوگوں کو نئے سال کی مبارکباد دینے کے ساتھ ساتھ ان کی آنے والی زندگیوں کے لیے نیک خواہشات کا اظہار بھی کیا۔

اداکارہ مایا علی نے اپنے انسٹاگرام پر ایک پوسٹ میں لکھا کہ 2019 ان کی زندگی کا بہترین سال رہا، انہوں نے یہ بھی کہا کہ یہ ساتھ اس لیے بھی خاص رہا کیوں کہ انہوں نے کچھ نئے رشتے بنائے جبکہ کچھ رشتے ختم بھی ہوگئے۔

اداکارہ نے مداحوں کو پیغام دیا کہ نئے سال کا استقبال کھلے دل سے کریں، کسی کا دل نہ توڑیں اور نفرت نہ پھیلائیں۔

ہمایوں سعید نے خانہ کعبہ کے سامنے اپنی ایک تصویر شیئر کی اور نئے سال کی مبارکباد دیتے ہوئے کہا کہ وہ ہمیشہ سے چاہتے تھے کہ اس مقام پر نئے سال کا آغاز کریں اور آج ان کا خواب پورا ہوگیا۔

علی ظفر نے نئے سال کے موقع پر کچھ اشعار تحریر کیے جو انہوں نے مداحوں کو بھی سنائے اور کہا کہ نئے سال کے موقع پر ان لوگوں کو ضرور یاد رکھیں جن کے پاس وہ نہیں جو آپ کے پاس ہے۔

فیصل قریشی نے نئے سال کی مبارکباد دیتے ہوئے مداحوں کو بتایا کہ انہوں نے اس روز 16 گھنٹے گاڑی چلائی اور اسلام آباد سے واپس کراچی اپنے گھر آگئے۔

فہد مصطفیٰ نے بھی مداحوں کو نئے سال کی مبارکباد دی اور پھر سے یاد دلایا کہ ٹک ٹاک ایپ سے دور رہنا چاہیے۔

گلوکار و اداکار فرحان سعید نے نئے سال کی مبارکباد دیتے ہوئے امید ظاہر کی کہ یہ سال لوگوں کی زندگیوں میں خوشیاں، پیاس اور اچھی قسمت لےکر آئے۔

اداکارہ مہوش حیات نے اپنی ایک اسٹائلش تصویر شیئر کرکے لکھا کہ وہ اس طرح سال 2020 میں قدم رکھنے جارہی ہیں۔

یاسر حسین نے اپنی نئی نویلی دلہن کے ہمراہ تصویر شیئر کرکے نئے سال کی مبارکباد دی۔

جبکہ اقرا عزیز نے بھی یاسر حسین کے ساتھ تصویر شیئر کی اور مداحوں کو دیے اپنے پیغام میں لکھا کہ انہیں امید ہے اس سال سب اپنے منصوبوں کو پورا کرسکیں۔

آپ سب کو بھی نئے سال کی مبارکباد!