سام سنگ کی جانب سے امریکی شہر سان فرانسسکو میں 11 فروری کو ایونٹ کے انعقاد کا اعلان کیا گیا ہے جس میں وہ رواں سال کے گلیکسی ایس سیریز کے لیے فونز پیش کرے گی۔

مختلف لیکس کے مطابق اس سال بھی گلیکسی ایس 11 فون 4 مختلف ورژن میں متعارف کرائے جائیں گے جبکہ جنوبی کورین کمپنی موٹرولا ریزر جیسے فولڈایبل فون کو بھی ساتھ میں پیش کرسکتی ہے۔

سام سنگ کا ایونٹ بارسلونا میں شیڈول موبائل ورلڈ کانگریس سے 2 ہفتے قبل ہوگا۔

اس سال سام سنگ کی جانب سے 4 فونز گلیکسی ایس 20، ایس 20 پلس، ایس 20 ای اور ایس 20 فائیو جی متعارف کرائے جانے کا امکان ہے۔

ان فونز میں ایکسینوس 990 پراسیسر (کچھ ممالک میں) اور اسنیپ ڈراگون 865 پراسیسر (بیشتر ممالک میں) دیا جائے گا جبکہ پہلے کے مقابلے میں زیادہ بڑی بیٹری دیئے جانے کا بھی امکان ہے جیسے ایس 20 پلس میں 5000 ایم اے ایچ بیٹری دی جائے گی۔

گلیکسی ایس 20 اور ایس 20 پلس میں بیک پر 4 کیمروں کا سیٹ اپ ہوگا جس میں سے ایک 108 میگا پکسل کیمرا ہوگا جو بائی ڈیفالٹ 12 میگا پکسل تصاویر کھینچے گا۔

اس کے علاوہ 48 میگا پکسل ٹیلی فوٹو 2 کیمرا 5 ایکس آپٹیکل زوم کے ساتھ، الٹرا وائیڈ کیمرا اور ٹائم آف فلائٹ سنسر دیا جائے گا جبکہ ان فونز میں میں 120 ہرٹز ریفریش ریٹ ڈسپلے دیا جائے گا۔

فون کے فرنٹ پر گلیکسی نوٹ سیریز کی طرح ہول پنچ ڈیزائن میں سیلفی کیمرا دیا جائے گا۔