وہ پہلی خاتون گلوکارہ تھیں جنہوں نے 18 سال کی عمر میں ’جیمز بانڈ‘ سیریز کی 25 ویں فلم کے لیے بھائی کے ساتھ مل کر گانا بنانے کا معاہدہ کیا تھا۔

اس سے قبل بھی بلی آئلش محض 17 سال کی عمر میں کئی ریکارڈ بنا چکی تھیں اور وہ پہلی خاتون گلوکارہ بنی تھیں جنہیں 18 سال سے قبل ہی معروف میوزیکل ایوارڈ ’گریمی‘ کے لیے نامزد کیا گیا تھا۔

اور اب وہ پہلی خاتون گلوکارہ بن گئی ہیں جنہوں نے بیک وقت 5 گریمی ایوارڈز جیتے ہیں۔

خبر رساں ادارے ’ایسوسی ایٹڈ پریس‘ (اے پی) کے مطابق 18 سالہ بلی آئلش وہ پہلی گلوکارہ بن گئیں جنہوں نے 18 سال کی عمر میں ’سال کے بہترین گانے، سال کے ایلبم، بہترین پہلے میوزک ایلبم، بہترین پاپ ووکل اور بہترین ریکارڈ‘ کے ایوارڈز اپنے نام کیے۔

یہ بھی پڑھیں: کم عمری میں ایک کے بعد ایک ریکارڈ بنانے والی گلوکارہ بلی آئلش

بلی آئلش سے قبل گلوکارہ و اداکارہ ٹیلر سوئفٹ نے 20 سال کی عمر میں ’بہترین پہلے میوزک ایلبم‘ کا ایوارڈ جیتا تھا تاہم انہوں نے صرف ایک ہی ایوارڈ اپنے نام کیا تھا۔

لیکن بلی آئلش نے محض 18 سال کی عمر میں بیک وقت 5 ایوارڈز اپنے نام کیے اور یوں وہ تاریخ کی پہلی گلوکارہ بن گئیں جنہوں نے یہ اعزاز حاصل کیا۔

دلچسپ بات یہ ہے کہ بلی آئلش اب تک بیک وقت 5 ایوارڈز جیتنے والی پہلی گلوکارہ بن گئی ہیں وہیں وہ یہ اعزاز حاصل کرنے والی اب تک کی دوسری شخصیت بن گئیں۔

بلی آئلش سے قبل 1981 میں گلوکار کرسٹوفر کراس نے بیک وقت 5 بڑے گریمی ایوارڈز جیتے تھے۔

گریمی ایوارڈز کی تقریب میں جہاں بلی آئلش نے 5 ایوارڈز اپنے نام کرکے نیا ریکارڈ بنایا وہیں ان کے 22 سالہ بھائی گلوکار فینس او کنیل نے بھی 6 ایوارڈز اپنے نام کیے۔

بلی آئلش کے بھائی نے ’بیسٹ پروڈیوسر آف دی ایئر‘ کے ایوارڈ سمیت 6 ایوارڈز اپنے نام کیے جب کہ لیڈی گاگا نے بھی 2 گریمی ایوارڈز جیتے۔

گریمی ایوارڈز کی تقریب میں مجموعی طور پر 84 کیٹیگریز میں ایوارڈز دیے گئے جس میں سے 11 ایوارڈز ایک ہی خاندان کے 2 گلوکاروں نے اپنے نام کیے۔

بلی آئلش اور ان کے بھائی فینس او کنیل نے 11 ایوارڈز اپنے نام کرکے نیا اعزاز حاصل کیا۔