خبر رساں ادارے ایسوسی ایٹڈ پریس (اے پی) کے مطابق ایڈن شیرن نے یکم ستمبر کو اپنی انسٹاگرام پوسٹ میں تصدیق کی کہ ان کی اہلیہ نے گزشتہ ہفتے بچی کو جنم دیا۔

گلوکار نے تصدیق کی کہ ان کی اہلیہ اور نوزائیدہ بچی خیریت سے ہیں اور دونوں صحت مند ہیں۔

ایڈ شیرن نے اہلیہ کے لیے نیک خواہشات پر مداحوں کا شکریہ بھی ادا کیا، ساتھ ہی انہوں نے بتایا کہ ان کی بیٹی کا نام لائرا انٹارکٹیکا سیبرن رکھا گیا ہے۔

ایڈ شیرن نے اگرچہ تصدیق کی کہ ان کے ہاں پچھلے ہفتے بچی کی پیدائش ہوئی تاہم انہوں نے بیٹی کی پیدائش کی تاریخ نہیں بتائی۔

دلچسپ بات یہ ہے کہ گزشتہ ماہ اگست میں ہی یہ خبر سامنے آئی تھی کہ ایڈ شیرن کی اہلیہ اُمید سے ہیں اور ان کے ہاں جلد بچے کی پیدائش متوقع ہے۔

ایڈ شیرن نے اپنی اہلیہ کے اُمید سے ہونے کی خبر تقریبا 8 ماہ تک مداحوں سے خفیہ رکھی۔

یہ بھی پڑھیں: ایڈ شیرن سب سے زیادہ کمانے والے انٹرٹینر

ایڈ شیرن نے جنوری 2019 میں اپنی دیرینہ گرل فرینڈ اور ہائی اسکول کی کلاس فیلو چیری سیبرن سے شادی کی تھی، دونوں نے 2018 کے وسط میں منگنی کی تھی۔

اگرچہ دونوں ایک دوسرے کو ہائی اسکول کے زمانے سے جانتے تھے تاہم اس باوجود دونوں کے درمیان رومانوی تعلقات 2015 کے بعد استوار ہوئے۔

کلاس فیلو چیری سیبرن سے شادی سے قبل ایڈ شیرن کے دیگر گلوکاراؤں سے بھی تعلقات رہے تھے۔