معروف امریکی میگزین پیپلز نے ذرائع سے اپنی رپورٹ میں بتایا کہ ایما اسٹون اور ڈیو میکری کی شادی کی افواہیں رواں ماہ 11 ستمبر سے جاری تھیں اور افواہوں کے بعد دونوں کو ایک جیسی انگوٹھیوں کے ساتھ انتہائی رومانوی انداز میں بھی دیکھا گیا۔

رپورٹ میں ہدایت کار ڈیو میکری کے قریبی ذرائع کا حوالہ دیتے ہوئے بتایا گیا کہ دونوں نے رواں ماہ کے آغاز میں ہی سادگی سے شادی کی تھی۔

رپورٹ میں تصدیق کی گئی کہ شادی کی افواہوں کی تصدیق کے لیے بھیجی گئی درخواست پر ایما اسٹون نے کوئی جواب نہیں دیا، البتہ ڈیو میکری کے قریبی ذرائع نے شادی کی تصدیق کی۔

ہدایت کار اور ٹی وی پرسنالٹی 34 سالہ ڈیو میکری اور 31 سالہ ایما اسٹون نے دسمبر 2019 میں سادگی سے منگنی کی تھی۔

اگرچہ ایما اسٹون نے فوری طور پر منگنی کے حوالے سے کوئی بات نہیں کی تھی تاہم ڈیو میکری نے اداکارہ کے ساتھ منگنی کے موقع پر انسٹاگرام پر تصویر شیئر کی تھی اور بعد ازاں اداکارہ نے بھی مختلف انٹرویوز کے دوران منگنی کی تصدیق کی تھی۔

یہ بھی پڑھیں: آسکر ایوارڈ یافتہ ایما اسٹون نے خفیہ طور پر منگنی کرلی

رواں برس مارچ میں شوبز ویب سائٹ پیج سکس نے اپنی رپورٹ میں بتایا تھا کہ کورونا کی وبا کے باعث ایما اسٹون اور ڈیو میکری نے شادی کرنے کا فیصلہ مؤخر کرلیا۔

تاہم اب پیپلز میگزین نے اپنی رپورٹ میں دعویٰ کیا کہ دونوں نے شادی کرلی، لیکن اس حوالے سے تاحال ایما اسٹون نے کوئی بیان نہیں دیا۔

دلچسپ بات یہ ہے کہ شادی کی افواہوں کے باوجود دونوں نے سوشل میڈیا اکاؤنٹس پر ایک ساتھ کوئی بھی تصویر شیئر نہیں کی اور نہ ہی افواہوں کی تردید یا تصدیق کی ہے۔

خیال رہے کہ دونوں کے درمیان 2017 کے آغاز میں تعلقات استوار ہوئے تھے اور دونوں نے 2 سال بعد دسمبر 2019 میں منگنی کی تھی۔

ڈیو میکری سے تعلقات استوار ہونے کے بعد ایما اسٹون نے ایک انٹرویو میں کہا تھا کہ 'جیسے جیسے وقت گزر رہا ہے، ویسے ویسے شادی اور بچوں کے حوالے سے ان کی سوچ میں بھی کافی حد تک تبدیلی آ رہی ہے، جب وہ چھوٹی تھیں تو سوچتی تھیں کہ وہ کبھی شادی نہیں کریں گی اور نہ ہی بچے پیدا کریں گی لیکن اب ان کی سوچ مختلف ہوچکی ہے'۔

اداکارہ کے ایسی باتوں کے بعد چہ مگوئیاں کی جا رہی تھیں کہ وہ جلد ہی شادی کے بندھن میں بندھ جائیں گی، تاہم انہوں نے خود کبھی واضح طور پر شادی کے حوالے سے بات نہیں کی۔