ہمارے معاشرے میں گوری رنگت اور خاص طور پر لڑکیوں کی رنگت کو ان کی کامیابی، اچھی شخصیت، شادی اور اچھی ملازمت حاصل کرنے کے لیے اہم سمجھا جاتا ہے۔

اسی لیے برصغیر پاک و ہند میں کئی دہائیوں سے رنگ گورا کرنے والی کریمز کا کاروبار جاری ہے اور ایسی کریمز بنانے والی کمپنیاں تشہیری مہم پر بھی کروڑوں روپے خرچ کرتی ہیں۔

گوری رنگت کرنے والی کریمز کی کمپنیاں کوشش کرتی ہیں کہ وہ تشہیری مہم کے لیے معروف شخصیات کی خدمات حاصل کریں، اس لیے ایسی کریمز کے اشتہارات میں زیادہ تر شوبز شخصیات دکھائی دیتی ہیں۔

مزید پڑھیں: آمنہ الیاس رنگ گورا کرنے والی کریمز کی تشہیر کرنے والی اداکاراؤں پر برہم

تاہم پاکستان کی کچھ معروف اداکارائیں ایسی بھی ہیں جنہوں نے بھاری معاوضے کی پیشکش کے باوجود ایسے اشتہارات میں کام سے منع کیا تھا جن میں عائشہ عمر، ماہرہ خان، صنم سعید، حریم فاروق اور گلوکارہ مومنہ مستحسن سمیت دیگر اداکارائیں بھی شامل ہیں۔

گزشتہ چند روز سے پاکستانی ماڈل و اداکارہ آمنہ الیاس بھی رنگ گورا کرنے والی کریمز کی تشہیر پر تنقید کررہی ہیں اور اس بار کی جانے والی تنقید میں انہوں نے کچھ مختلف انداز اپنایا ہے۔

آمنہ الیاس نے سوشل میڈیا ایپ انسٹاگرام پر ایک ویڈیو شیئر کی جس کے کیپشن میں انہوں نے طنزیہ انداز میں لکھا کہ میرا گورا بننے کا سپنہ سچ ہوا۔

فیئرنس کریمز کے اشتہارات کے انداز میں بنی اس طنزیہ ویڈیو میں آمنہ الیاس کہتی ہیں کہ میں ہوں آمنہ الیاس، آپ میری کامیابی کی وجہ جاننا چاہتے ہیں؟

جس کے بعد وہ آٹے سے بھری ڈش میں اپنا منہ ڈالتی ہیں اور کہتی ہیں کہ اب کریں گے میرے فینز میرا اعتماد۔

یہ بھی پڑھیں: سجل علی کو ’نکھری رنگت‘ کی تشہیر کرنا مہنگا پڑ گیا

چند روز قبل بھی سماجی رابطے کی ویب سائٹ ٹوئٹر پر کی گئی ٹوئٹ میں آمنہ الیاس نے کہا تھا کہ انڈسٹری میں موجود میری ساتھی اداکارائیں پیسے کی خاطر رنگ گورا کرنے والی کریمز کی تشہیر کررہی ہیں۔

آمنہ الیاس نے لکھا تھا کہ بطور عوامی شخصیت ہماری جانب سے کسی چیز کے اثرات مرتب ہونے کا مطلب ہے کہ ہم دوسروں کو خوبصورتی کا احساس کروائیں نہ کہ انہیں خود کو کم خوبصورت محسوس کروائیں۔

ان کا مزید کہنا تھا کہ ان لوگوں کو شرم آنی چاہیے جو اب بھی اس قسم کی سوچ کی تائید کرتے ہیں۔

مزید پڑھیں: گوری رنگت کے اشتہارات مسترد کرنے والی پاکستانی اداکارائیں

تاہم آمنہ الیاس نے ان اداکاراؤں کے نام نہیں لیے تھے جن پر انہوں نے برہمی کا اظہار کیا اور ساتھ ہی رنگت کے فرق کے خاتمے سے متعلق ہیش ٹیگ endcolourism# بھی استعمال کیا۔

اس سے قبل اداکارہ نے فوٹو شیئرنگ ایپ انسٹاگرام پر خود اعتمادی پر مبنی ایک پیغام شیئر کیا تھا جس میں ان کا مطلب تھا کہ ان کی رنگت کبھی ان کے عزائم سے پیچھے ہٹنے کی وجہ نہیں ہوگی۔

آمنہ الیاس نے لکھا تھا کہ ‘میری گہری رنگت میرے پیچھے ہونے کی وجہ نہیں ہوگی، کولونائزیشن یا مائیکرایگریشنز کے طوق سے مجھے فرق نہیں پڑتا، میں اپنے مقاصد طے کروں گی اور انہیں حاصل کروں گی۔