اسکارلٹ جانسن نے پہلی شادی کینڈین اسٹار ریان رونلڈس سے 2008 میں کی تھی، دونوں کے درمیان شادی سے 2 سال قبل ہی تعلقات استوار ہوئے تھے اور 2007 میں منگنی کرنے کے بعد انہوں نے اگلے سال ہی شادی کی تھی۔

تاہم اسکارلٹ جانسن کی پہلی شادی زیادہ عرصہ نہ چل سکی اور انہوں نے 2010 میں شوہر سے علیحدگی اختیار کرلی اور 2011 میں ان کی طلاق ہوگئی تھی۔

پہلی شادی کی ناکامی کے ایک سال بعد ہی اداکارہ نے فرانسیسی صحافی رومین ڈیوریک سے تعلقات استوار کیے اور دونوں نے 2012 میں شادی کی تھی۔

یہ بھی پڑھیں: اسکارلٹ جانسن نے خاموشی سے منگنی کرلی

جوڑے کے ہاں ایک بچی بھی ہوئی لیکن ان دونوں کی شادی بھی زیادہ عرصے تک نہ چل سکی اور 2014 میں دونوں کے درمیان طلاق ہوگئی۔

دونوں شادیاں ناکام ہونے کے بعد اسکارلٹ جانسن کی جانب سے دیگر چند ساتھی اداکاروں سے تعلقات استوار کرنے کی خبریں بھی آتی رہیں تاہم ان کی تصدیق نہ ہوسکی تھی۔

لیکن گزشتہ برس مئی میں اداکارہ نے دیرینہ دوست ٹی وی اداکار و کامیڈین کولن جوسٹ سے منگنی کرکے سب کو حیران کردیا تھا۔

اور اب دونوں نے اچانک شادی کرکے اپنے مداحوں کو ایک بار پھر حیران کردیا۔

امریکی نشریاتی ادارے سی این این نے اپنی رپورٹ میں ایک فلاحی ادارے کی پوسٹ کا حوالہ دیتے ہوئے بتایا کہ دونوں نے اکتوبر کے آخری ہفتے میں خاموشی سے شادی کرلی۔

ضعیف افراد کی دیکھ بھال کرنے والی سماجی تنظیم نے اپنی ٹوئٹ میں بتایا تھا کہ اسکارلٹ جانسن اور کولن جوسٹ نے اکتوبر کے آخری ہفتے کے اختتام پر شادی کرلی۔

سی این این نے اپنی رپورٹ میں بتایا کہ جوڑے نے کورونا کے پیش نظر سخت احتیاطی تدابیر کے ساتھ سادگی سے شادی کی تقریب منعقد کی اور دونوں کی شادی پر شوبز شخصیات نے ان کے لیے نیک خواہشات کا اظہار بھی کیا۔