حال ہی میں دبئی میں کھیلے گئے انڈین پریمیئر لیگ کے میچ میں کنگز الیون پنجاب کے فیلڈر نکلوس پوران کی جانب سے پھینکی گئی تھرو سن رائزرز حیدرآباد کے وجے شنکر کے ہیلمٹ پر لگی جس کے بعد وہ زمین پر گر گئے۔

ٹنڈولکر نے اس واقعے کی ویڈیو کے حوالے سے تبصرہ کرتے ہوئے کہا کہ کھیل دن بدن تیز ہوتا جا رہا ہے لیکن کیا یہ محفوظ بھی ہو رہا ہے؟ حال ہی میں ہم نے ایک واقعہ دیکھا جو بہت خطرناک ثابت ہو سکتا تھا۔

مزید پڑھیں: بلے بازوں اور وکٹ کیپرز کیلئے ہیلمٹ لازمی

انہوں نے مطالبہ کیا کہ اس بات سے قطع نظر کہ بلے باز اسپنر کا سامنا کر رہا ہے یا فاسٹ باؤلر کا، پیشہ ورانہ سطح پر بلے باز کے لیے ہیلمٹ کا استعمال لازمی قرار دیا جائے۔

سچن ٹنڈولکر نے ٹوئٹر پر دنیا کے تمام کرکٹ بورڈز کو ٹیگ کرتے ہوئے انٹرنیشنل کرکٹ کونسل سے درخواست کی وہ اس معاملے کو ترجیحی بنیادوں پر حل کرے۔

واضح رہے کہ 2014 میں سڈنی میں کھیلے گئے شیفلڈ شیلڈ کے میچ میں آسٹریلین بلے باز فل ہیوز گردن پر گیند لگنے سے زخمی ہو گئے تھے، انہیں ہنگامی بنیادوں پر ہسپتال منتقل کیا گیا تھا اور دو دن کوما میں رہنے کے بعد وہ انتقال کر گئے تھے۔

اس واقعے کے بعد سے انٹرنیشنل کرکٹ کونسل ہیلمٹ کے معیار میں بہتری کے لیے اقدامات کیے لیکن سابق کرکٹرز مستقل اس سلسلے میں حفاظتی اقدامات کا مطالبہ کررہے ہیں۔

ایک اور ٹوئٹ میں انہوں نے روی شاستری کو مخاطب کرتے ہوئے یاد دلایا کہ کس طرح ایک نمائشی میچ میں فُل ٹاس گیند پر ان کے بلے کا باہری کنارہ لیتی ہوئی گیند نکل گئی تھی اور وہ بال بال بچے تھے۔

ٹنڈولکر نے کہا کہ یہ خطرناک انجری ہوسکتی تھی لیکن شکر ہے کہ ایسا نہیں ہوا۔

سابق کرکٹر پارگیان اوجھا نے بھی ہیلمٹ کے حوالے سے ٹنڈولکر کے تحفظات کی حمایت کرتے ہوئے کہا ہے کہ ہیلمٹ کو وکٹ کیپر، قریب کھڑے فیلڈرز اور حتیٰ کہ امپائرز کے لیے لازمی قرار دیا جانا چاہیے۔

یہ بھی پڑھیں: آئی سی سی نے ہیلمٹ کا نیا قانون متعارف کرادیا

سابق اسپنر نے ٹوئٹ کی کہ بلے بازوں، قریب کھڑے وکٹ کیپرز، شارٹ لیگ اور سی پوائنٹ فیلڈرز اور دونوں امپائرز کے لیے لازمی قرار نہیں دیا جاتا؟ حفاظت اہم ہے۔

واضح رہے کہ سر گیند لگنے کے واقعات کو مدنظر رکھتے ہوئے آئی سی سی نے کنکشن سب (سر گیند لگنے سے انجری کا شکار کھلاڑی) کے متبادل کا اعلان کیا تھا جس کے تحت میچ میں اس طرح کی انجری کا شکار ہوکر زخمی ہونے والے کھلاڑی کے متبادل کو طبی معائنے کے بعد میدان میں جانے کی اجازت ہوتی ہے اور بیٹنگ اور باؤلگ دونوں کر سکتا ہے۔

اس سے قبل آئی سی سی قوانین کے تحت گزشتہ سو سال سے زائد عرصے سے میچ میں زخمی ہونے والے کھلاڑی کی جگہ گراؤنڈ میں متبادل آ جاتا ہے لیکن اسے بیٹنگ یا باؤلنگ کی اجازت نہیں ہوتی تھی۔