سری لنکن نژاد کینیڈین ناول نگار شیام سلوادرئی کے 1994 میں شائع ہونے والے ناول ’فنی بوائے‘ پر بنائی گئی فلم کو 10 دسمبر کو نیٹ فلیکس پر ریلیز کیا جائے گا۔

اداکار علی کاظمی نے انسٹاگرام پر ایک پوسٹ میں بتایا کہ فلم 'فنی بوائے' کو آسکر ایوارڈ کے لیے نامزد کیا گیا ہے۔

انہوں نے خوشی کا اظہار کرتے ہوئے کہا کہ ان کا خواب پورا ہونے کو ہے۔

مزید پڑھیں: علی کاظمی کی سیاست، خانہ جنگی اور جنسیت پر بنی فلم ’فنی بوائے‘

دوسری جانب ورائٹی کی رپورٹ میں کہا گیا کہ فنی بوائے فلم آسکر ایوارڈز 2021 میں بہترین انٹرنیشنل فیچر فلم کی دوڑ میں کینیڈا کی نمائندگی کرے گی۔

ٹیلی فلم کینیڈا کے ایگزیکٹو ڈائریکٹر کرسٹا ڈیکنسن نے کہا کہ رواں سال 11 فلموں کو نامزد کیا گیا ہے اور ہم پراعتماد ہیں کہ دیپا مہتا کہ فلم فنی بوائے اکیڈمی کے اراکین کو پسند آئے گی جس طرح 2007 میں 'واٹر فلم' پسند آئی تھی۔

کینیڈا میں فلموں کو نامزد کرنے والی کمیٹی 20 افراد پر مشتمل ہیں جس میں اہم حکومتی ایجنسیز اور نیشنل فلم انڈسٹری ایسوسی ایشنز شامل ہیں۔

انٹرنیشنل فیچر فلم کی کیٹیگری میں شارٹ لسٹ ہونے والی 10 فلموں کی فہرست 9 فروری کو جاری کی جائے گی اور 15 مارچ کو 5 نامزدگیوں کا اعلان کیا جائے گا جس کے بعد 25 اپریل کو 93ویں آسکر ایوارڈز کی تقریب منعقد ہوگی۔

’فنی بوائے‘ کی ہدایات معروف بھارتی فلم ساز دیپا مہتا نے دی ہیں، جنہوں نے ماضی میں ’فائر، واٹر، ارتھ اور مڈنائٹ چائلڈ‘ جیسی معروف فلمیں بنائی ہیں۔

’فنی بوائے‘ کی کہانی 1970 سے 1980 کے وقت کی ہے تاہم لکھاری نے اس طرح بیان کیا ہے کہ وہ آج بھی نئے دور کی کہانی لگتی ہے۔

’فنی بوائے‘ میں گھر کی بے جا پابندیوں کے باعث ہم جنس پرست بن جانے والے لڑکے کے والد کا کردار پاکستانی نژاد کینیڈین اداکار علی کاظمی نے ادا کیا ہے، جو اس سے قبل بھی متعدد انگریزی اور اردو فلموں میں شاندار اداکاری کر چکے ہیں۔

فلم کی شوٹنگ سری لنکا میں ہی کی گئی اور فلم میں سری لنکا کی خانہ جنگی اور سیاست دکھانے کی وجہ سے اسے شوٹنگ میں مشکلات کا بھی سامنا رہا اور فلم کو مکمل ہونے میں چند سال لگے۔

’فنی بوائے‘ 4 دسمبر کو سی بی سی براڈ کاسٹ پر ریلیز کیا جائے گا جس کے بعد اسی کے ذریعے اسٹریم آن ڈیمانڈ سروس سی بی سی جیم پر کینیڈا میں عوام کو دستیاب ہوگی اور پھر اسے 10 دسمبر کو امریکا، برطانیہ، نیوزی لینڈ اور آسٹریلیا میں نیٹ فلیکس پر ریلیز کیا جائے گا۔