مسلم لیگ (ق) کے قائد چوہدری پرویز الہیٰ کے گھر پر ملاقات کے بعد ان کے ہمراہ میڈیا سے گفتگو کرتے ہوئے ان کا کہنا تھا کہ ’مسلم لیگ (ق) کے ساتھ میرے تو کوئی تحفظات نہیں ہیں‘۔

ایک صحافی کے سوال کے جواب میں انہوں نے کہا کہ ’میں یہاں چوہدری برادران کے لیے کسی کا کوئی پیغام نہیں لے کر آیا ہوں‘۔

مزید پڑھیں: مسلم لیگ (ن) میں اختلافات، عبدالقادر بلوچ اور ثنااللہ زہری کا پارٹی چھوڑنے کا فیصلہ

مسلم لیگ (ن) پر تنقید کرتے ہوئے ان کا کہنا تھا کہ مسلم لیگ (ن) کے لوگ پی ٹی آئی میں آنا نہیں چاہتے بلکہ وہ بس نواز شریف کے بیانیے کے ساتھ نہیں ہیں جبکہ پیپلز پارٹی، مسلم لیگ (ن) سے بہتر کھیلی ہے۔

ان کا کہنا تھا کہ ’پہلے میں فروری کہتا تھا اور اب جنوری کی پیش گوئی کرتا ہوں کہ مسلم لیگ (ن) کے رہنماؤں کی آواز اٹھنے والی ہے‘۔

انہوں نے کہا کہ ’مسلم لیگ (ن) بند گلی میں داخل ہوچکی ہے، انہوں نے اپنا بیانیہ تبدیل نہ کیا تو بھاری نقصان اٹھانا پڑے گا‘۔

شیخ رشید کا کہنا تھا کہ ’نواز شریف کہتے تھے کہ ہماری لڑائی عمران خان سے نہیں کسی اور سے ہے، اب کہتے ہیں کہ عمران خان کو ہٹاؤ‘۔

یہ بھی پڑھیں: مسلم لیگ (ن)، پیپلز پارٹی کا گلگت بلتستان کے انتخابات کو شفاف بنانے کا مطالبہ

ان کا کہنا تھا کہ ’مریم نواز نے دو وجوہات پر اپنا بیانیہ بدلہ، ایک انہیں گلگت میں اپنی شکست نظر آگئی ہے اور دوسرا مسلم لیگ (ن) بی جے پی کی آواز نہیں ہوسکتی، ان کی پارٹی میں سے آوازیں اٹھ رہی ہیں‘۔

انہوں نے دعویٰ کیا کہ سینیٹ انتخابات کے بعد ملک میں استحکام آئے گا، مسلم لیگ (ن) پی ڈی ایم کی چھتری کے نیچے ڈائیلاگ کرنے جارہی ہے۔

وزیر ریلوے کا کہنا تھا کہ گلگت بلتستان میں ہار دیکھ کر ان کے چہرے اترے ہوئے ہیں، انتخابات میں پی ٹی آئی پہلے نمبر پر ہوگی، دوسرے پر پیپلز پارٹی اور تیسرے پر آزاد اُمیدوار ہوں گے۔

ان کا کہنا تھا کہ ’عمران خان مہنگائی ختم کرنے جارہے ہیں، آٹے چینی کی قیمت کم ہوگی اس پر کام ہورہا ہے‘۔