حال ہی میں 'ڈنک' ڈرامے کا پوسٹر سماجی رابطے کی مختلف سائٹس پر جاری کیا گیا تھا اور اس میں مرکزی کردار ادا کرنے والے اداکار بلال عباس نے بھی اپنے انسٹاگرام اکاؤنٹ پر اسے شیئر کیا تھا۔

تاہم ڈرامے کا نام ڈنک ہونے کی وجہ سے مداحوں نے اسے غلطی سے پاکستان سپر لیگ (پی ایس ایل) کی ٹیم لاہور قلندرز کی نمائندگی کرنے والے آسٹریلین بلے باز کو ٹیگ کرنا شروع کردیا۔

جس پر بین ڈنک نے انسٹاگرام پر جاری اسٹوری میں 'ڈنک' ڈرامے کا پوسٹر شیئر کیا اور بتایا کہ ان کے بہت سے مداح انہیں اس تصویر پر ٹیگ کررہے ہیں۔

بین ڈنک نے انسٹاگرام اسٹوری میں اداکار بلال عباس کو ٹیگ کرتے ہوئے انہیں نئے ہیئر کٹ کا مشورہ دے دیا۔

انہوں نے کہا کہ میرا خیال ہے کہ اداکار بلال عباس کو نئے ہیئر کٹ کی ضرورت ہے۔

بین ڈنک کی اسٹوری پر ردعمل دیتے ہوئے بلال عباس نے کہا کہ میں آپ کی بات سے بالکل اتفاق کرتا ہوں، مجھے یقین ہے کہ آپ اس بات کو بہتر سمجھتے ہوں گے کہ لمبے بال رکھنا کتنا مشکل ہے۔

بلال عباس نے اپنی اسٹوری میں ساتھ ہی لکھا کہ وہ مذاق کررہے ہیں۔

بعدازاں بلال عباس کے بیان پر بین ڈنک نے کہا کہ ایک وقت تھا جب مجھے اپنے بالوں کا خیال رکھنا پڑتا تھا۔

خیال رہے کہ 'ڈنک' نامی یہ ڈراما جلد نجی ٹی وی چینل اے آر وائے سے نشر ہوگا جس میں اداکار بلال عباس خان اور ثنا جاوید مرکزی کرداروں میں دکھائی دیں گے۔

تاہم ڈراما کب نشر ہوگا اس حوالے سے کوئی اعلان سامنے نہیں آیا۔