ہولی وڈ کے زیادہ تر سائنس فکشن و فنٹیسی فلموں کے کرداروں پر متعدد فلمیں، ویب سیریز، ڈرامے اور ویڈیو گیمز بنائی جاتی ہیں، ساتھ ہی ان پر الگ کتابیں بھی لکھی جاتی ہیں۔

اسی لیے ہی ہیری پوٹر اور گیم آف تھرونز سمیت اسٹار وارز فلم سیریز کے کرداروں پر بھی تاحال فلمیں اور ٹی وی سیریز بنائے جانے کا سلسلہ جاری ہے۔

اسٹار وارز فرنچائز نے 2019 میں معروف کردار یوڈا پر خصوصی سیریز ’دی مینڈالورین‘ بنائی تھی، جس میں 1973 میں ریلیز کی گئی پہلی فلم کے کردار کے چھوٹے بچے یعنی بے بی یوڈا کو دکھایا گیا تھا۔

ڈی مینڈالورین میں بے بی یوڈا کی واپسی پر دنیا بھر میں سائنس فکشن فلموں و سیریز کے شائقین بہت خوش ہوئے تھے اور اب اسٹار وارز فرنچائز نے اعلان کیا کہ فلم کے ایک اور کردار ’بوبا فیٹ‘ پر بھی سیریز بنائی جائے گی۔

خبر رساں ادارے رائٹرز کے مطابق اسٹار وارز سیریز کی پہلی فلموں میں دکھائے جانے والے روبوٹک ولن کردار ’بوبا فیٹ‘ کے تخلیق کار نے تصدیق کی کہ اسی کردار پر اب سیریز بنائی جائیں گی۔

’بوبا فیٹ‘ کے تخلیق کار جون فیوریو نے تصدیق کی کہ اس کردار پر بنائی گئی سیریز کو ڈزنی پلس پر ریلیز کیا جائے گا۔

جون فیوریو کے مطابق ’بوبا فیٹ‘ کے کردار پر لکھی گئی کتاب سے سیریز کی کہانی لی جائے گی اور یہ سیریز اسٹار وارز کے دیگر کرداروں پر بنائی جانے والی سیریز کی طرح الگ ہوگی۔

ابھی ’بوبا فیٹ‘ کے کردار پر بنائی جانے والی سیریز کے نام کا اعلان نہیں کیا گیا اور یہ بھی واضح نہیں ہے کہ اس کو کون سا اداکار ادا کرے گا۔

یہ بھی پڑھیں: ’اسٹار وارز‘ کے ’بوبا فیٹ‘ چل بسے

تاہم خیال کیا جا رہا ہے کہ آئندہ چند ماہ میں ’بوبا فیٹ‘ کے کردار کرنے والے اداکار کے نام کا اعلان کیا جائے گا اور ساتھ ہی دیگر کاسٹ اور سیریز کا نام بھی بتا دیا جائے گا۔

جون فیوریو نے تصدیق کی کہ ’بوبا فیٹ‘ پر بنائی جانے والی ویب سیریز کو دسمبر 2021 تک ریلیز کردیا جائے گا۔

خیال رہے کہ ’اسٹار وارز‘ کی 1980 میں ریلیز ہونے والی فلم ’دی امپائر اسٹرائیکس بیک‘ اور 1983 میں ریلیز ہونے والی فلم ’رٹرن آف دی جوڈی‘ میں ’بوبا فیٹ‘ کا کردار ادا کرنے والے برطانوی اداکار جیرمی بلوک حال ہی میں چل بسے تھے۔

جیرمی بلوک نے روبوٹ نما اس کردار کو ادا کرنے کے بعد ہی شہرت حاصل کی تھی، مذکورہ کردار فلم میں دراصل جرائم پیشہ شخص کا ساتھی ہوتا ہے، جو اس کے برے کاموں میں اس کا ساتھ دیتا ہے۔