صنم جنگ نے رواں ماہ 14 دسمبر کو اپنی انسٹاگرام اسٹوری کے ذریعے مداحوں کو اطلاع دی تھی کہ ان میں کورونا کی تشخیص ہوئی ہے اور انہوں نے بیٹی سمیت خود کو قرنطینہ کرلیا۔

اداکارہ نے بتایا تھا کہ ان میں اور ان کی کم سن بیٹی میں کورونا کی شدید علامات نہیں ہیں اور انہوں نے ڈاکٹرز کے مشورے پر عمل کرتے ہوئے خود کو قرنطینہ کیا۔

اداکارہ کی جانب سے خود کو اور بیٹی کو قرنطینہ کیے جانے کے محض 11 دن بعد 25 دسمبر کو اداکارہ نے تصدیق کی کہ وہ اور ان کی بیٹی عالیہ کورونا سے صحت یاب ہوگئیں۔

یہ بھی پڑھیں: اداکارہ صنم جنگ اور ان کی بیٹی میں کورونا کی تشخیص

صنم جنگ نے انسٹاگرام پر بیٹی کے ساتھ کھیلنے کی تصویر شیئر کرتے ہوئے تصدقی کی کہ وہ اور ان کی بیٹی کورونا سے صحت یاب ہوگئیں۔

اداکارہ نے قرنطینہ کے دوران صحت معلوم کرنے کے لیے فون کالز اور پیغامات بھیجنے والے افراد کا شکریہ ادا کیا اور ساتھ ہی انہوں نے صحت یابی کے لیے دعائیں کرنے پر مداحوں کا بھی شکریہ ادا کیا۔

اداکارہ کی صحت یابی کی پوسٹ پر کئی مداحوں نے کمنٹس میں ان کے لیے نیک خواہشات کا اظہار کیا۔

صنم جنگ سے قبل اداکارہ نیلم منیر بھی کورونا سے صحت یاب ہوچکی ہیں، جب کہ عامر لیاقت حسین، ان کی اہلیہ اداکارہ طوبیٰ عامر، اداکار بہروز سبزواری بھی صحت یاب ہوچکے ہیں۔

مزید پڑھیں: نیلم منیر محض 11 دن میں کورونا سے صحت یاب

ان سے قبل کورونا میں مبتلا ہونے والے اداکار عثمان مختار، ماڈل و اداکارہ صحیفہ جبار، ندا یاسر، یاسر نواز اور دیگر اداکار بھی کورونا سے 2 سے تین ہفتوں کے درمیان صحت یاب ہوچکے تھے۔

پاکستانی شوبز شخصیات سمیت کورونا میں مبتلا ہونے والی بولی وڈ و ہولی وڈ کی بھی متعدد شخصیات بھی کورونا سے 2 سے تین ہفتوں کے درمیان صحت یاب ہوچکی تھیں۔