سوشل میڈیا پر چلنے والی بعض خبروں میں یہ دعویٰ بھی کیا گیا تھا کہ دونوں میں علیحدگی نہیں بلکہ طلاق ہوچکی ہے۔

ایسی خبروں کا کوئی مستند ذریعہ بتائے بغیر دونوں کی زندگی کے حوالے سے بڑے بڑے دعوے کیے گئے اور بعض سوشل میڈیا پیجز پر یہ دعوے بھی کیے گئے کہ فیروز خان کے اداکارہ ہانیہ عامر سے تعلقات ہیں، اس وجہ سے ان کی اہلیہ سے علیحدگی ہوئی۔

تاہم اب فیروز خان نے ان افواہوں پر کھل کر بات کی ہے لیکن اس کے باوجود انہوں نے خاندانی معاملات پر میڈیا کے سامنے واضح طور پر بات کرنے سے گریز کیا۔

'سم تھنگ ہاٹ' کو دیے گئے انٹرویو میں فیروز خان نے ہانیہ عامر سے تعلقات کی خبروں پر کھل کر بات کی اور بتایا کہ انہیں ایسی افواہیں سن کر جہاں تکلیف ہوئی، وہیں ان افراد پر غصہ بھی آیا، جو ایسی افواہیں پھیلا رہے ہیں۔

یہ بھی پڑھیں: فیروز خان اور ان کی اہلیہ کے درمیان علیحدگی کی خبریں

فیروز خان نے واضح کیا کہ وہ اور ہانیہ عامر صرف بہترین دوست ہیں اور دونوں کے درمیان آج بھی دوستی اور ایک دوسرے کی عزت و احترام کا رشتہ قائم ہے۔

انہوں نے ہانیہ عامر کے ساتھ رومانوی تعلقات کی خبروں کو مسترد کیا اور کہا کہ ان کے درمیان ایسا کچھ بھی نہیں ہے اور ان سے متعلق جو بھی دعوے کیے جا رہے ہیں، وہ جھوٹ پر مبنی ہیں۔

انہوں نے افواہیں پھیلانے اور جھوٹے دعوے کرنے والے ایک یوٹیوبر سید علی حیدر کا ذکر بھی کیا اور کہا کہ وہ چند روپوں کی خاطر ان پر غلط الزام لگا رہے ہیں۔

انہوں نے کہا کہ ان سے اور ہانیہ عامر سے متعلق غلط خبریں آنے کے بعد ہانیہ عامر نے ان سے پوچھا تھا کہ یہ کیا ہو رہا ہے؟ جس پر انہوں نے اداکارہ کو بتایا کہ انہیں خود معلوم نہیں کہ کیا ہو رہا ہے۔

فیروز خان کا کہنا تھا کہ اگر وہ چاہیں تو جھوٹی افواہیں پھیلانے والوں کے خلاف سائبر کرائم میں شکایت کر سکتے ہیں اور ایسے افراد کو جھوٹ پھیلانے کے جرم میں جیل جانا پڑ سکتا ہے تاہم وہ ایسا نہیں کر رہے۔

انہوں نے افواہیں پھیلانے والے افراد کو پیغام دیا کہ وہ دوسروں کی عزت اور زندگی سے چند ہزار روپے کے عوض کھیل رہے ہیں۔

مزید پڑھیں: علیحدگی کی خبروں کے بعد فیروز خان و اہلیہ کی مبہم سوشل میڈیا پوسٹس

ایک سوال کے جواب میں انہوں نے اہلیہ سے علیحدگی یا ان سے تعلقات کشیدہ ہونے کے معاملے پر بات کرنے سے معذرت کی اور کہا کہ وہ اپنی نجی زندگی سے متعلق میڈیا پر کوئی بات نہیں کرنا چاہتے۔

انہوں نے واضح کیا کہ جب انہیں محسوس ہوگا کہ انہیں اپنی ذاتی زندگی سے متعلق کوئی بات مداحوں کو بتانی چاہیے تو وہ خود ہی اس کا اعلان کریں گے۔

فیروز خان نے کہا کہ وہ اپنے خاندانی اور نجی زندگی کے معاملات پر خاموش رہنا بہتر سمجھتے ہیں، اس لیے وہ دوسروں کو بھی یہ اپیل کرتے ہیں کہ وہ ان کی یا کسی اور کی ذاتی زندگی سے متعلق افواہیں نہ پھیلائیں۔

خیال رہے کہ فیروز خان نے مارچ 2018 میں علیزے سلطان سے شادی کی تھی اور دونوں کے ہاں مئی 2019 میں پہلے بچے کی پیدائش ہوئی تھی۔

فیروز خان نے شادی کے دو سال بعد رواں برس مارچ میں شوبز سے کنارہ کشی کا اعلان کیا تھا لیکن حال ہی میں انہوں نے شوبز میں دوبارہ واپسی کا اعلان بھی کیا تھا۔