ندا یاسر نے اپنی سوشل میڈیا پوسٹس میں والدہ اور بہن و بھائیوں کے ساتھ کھچوائی گئی پرانی تصویر شیئر کرتے ہوئے مداحوں کو بتایا کہ ان کی والدہ ان سے بچھڑ گئیں۔

اداکارہ نے مختصر پوسٹ میں والدہ کو بہادر، مضبوط اور زندگی کے مسائل کا سامنا کرنے والی خاتون قرار دیتے ہوئے ان کی وفات کی تصدیق کی تاہم انہوں نے یہ نہیں بتایا کہ ان کی والدہ کا انتقال کیسے ہوا۔

اداکارہ کی والدہ کا انتقال ایک ایسے وقت میں ہوا جب وہ شوہر اور بچوں کے ساتھ جنوبی ایشیا کے ملک مالدیپ میں چھٹیاں منانے کے لیے گئی ہوئی ہیں۔

ندا یاسر نے والدہ کے انتقال سے چند گھنٹے قبل ہی مالدیپ میں اہل خانہ کے ساتھ گزارے گئے خوبصورت لمحات کی تصاویر اور ویڈیوز بھی شیئر کی تھیں۔

اداکارہ کی شوہر اور بچوں کے ساتھ مالدیپ کے سمندری سیاحتی مقام پر گزارے گئے لمحات کی تصاویر و ویڈیوز سوشل میڈیا پر خوب وائرل بھی ہو رہی ہیں۔

اداکارہ کی جانب سے والدہ کے انتقال کی خبر شیئر کیے جانے کے بعد مداحوں، شوبز و سیاسی شخصیات نے ان کے ساتھ دکھ اور افسوس کا اظہار کیا۔