عاطف اسلم نے سوشل میڈیا اور یوٹیوب پر جلد ریلیز ہونے والے رومانوی گیت ’رات‘ کی پہلی جھلک جاری کردی، جس میں انہیں سائرہ یوسف کے ساتھ رومانوی انداز میں دیکھا جا سکتا ہے۔

سائرہ یوسف نے بھی اپنے انسٹاگرام پر ’رات‘ کا ٹیزر پوسٹر جاری کیا اور بتایا کہ جلد ان کا مذکورہ گانا ریلیز ہوگا۔

’رات‘ کی ہدایات گلوکار و موسیقار یاسر جسوال دیں گے، تاہم ابھی یہ واضح نہیں ہے کہ گانے کی موسیقی کس نے ترتیب دی ہے اور اس کی شاعری کس نے لکھی ہے۔

عاطف اسلم اور سائرہ یوسف کی جانب سے شیئر کی گئی گانے کے ٹیزر پوسٹر میں گانے کی رومانوی دھن کے پس منظر میں دونوں کو رومانوی انداز میں ایک دوسرے سے آنکھوں سے آنکھیں ملاتے ہوئے دیکھا جا سکتا ہے۔

عاطف اسلم نے گزشتہ برس نومبر میں ’ویلو میوزک اسٹیشن‘ میں پنجابی گانے ’کدی تے ہنس بول وے‘ میں آواز کا جادو جگایا تھا۔

عاطف اسلم نہ صرف پاپ میوزک بلکہ رومانوی بولی وڈ گیتوں میں آواز کا جادو جگانے کی وجہ سے بھی معروف ہیں۔

سائرہ یوسف کے ساتھ پہلی بار گلوکار کے رومانوی گیت پر دونوں کے مداح بے صبری سے انتظار کر رہے ہیں، سائرہ یوسف بھی ’رات‘ کے ذریعے کافی عرصے بعد کسی رومانوی گیت میں جلوے بکھیرتے دکھائی دیں گی۔